Ittoqqortoormiini nannunik nakkutilliisarneq nangissaaq
Nannunik Ittoqqortoormiini aggustip aallartisimalaarneraniilli nakkutilliisoqartalerpoq, unnuaanerani nannunik Ittoqqormiinut qanillattortoqarsimanersoq nakkutigineqalerluni.
Ittoqqortoormiini innuttaasut toqqissisimanissaat siunertaralugu nannunik nakkutilliisoqartalerpoq, taamatullu nakkutilliisarneq oktobarip naanissaata tungaanut sivitsorneqarpoq.
Aamma atuaruk Illoqarfimmiut toqqissisimanissaat siunertaralugu nannunik nakkutilliisoqalersoq
Nannunik nakkutilliisarnerup septembarip naanerani unitsinneqarnissaa pilersaarutaagaluarpoq, Verdensnaturfondenilli nakkutilliisarnernut aningaasaliissutini nangillugit nakkutilliisarneq tassa maanna oktobarip naanissaata tungaanut sivitsorpaa.
Nannunik nakkutilliisarnerup sivitsorneqarnissaanik Ittoqqortoormiini innuttaasut kissaateqarnerat aallaavigalugu nannunik suli nakkutilliisoqartassaaq.
Taamatut nannunik nakkutilliisarnerup aappaagu annertusarneqarnissaa, Verdensnaturfondenip pilersaarutigaa, nakkutilliisut pitsaanerusunik atortoqartinneqalernissaat pilersaarutaalluni.
Aamma atuaruk WWF-p inuit nannullu akornanni akerleriinnerit annikillisinniarpai