WWF-p inuit nannullu akornanni akerleriinnerit annikillisinniarpai
Illoqqortoormiut eqqaanut illoqarfiulluunniit iluanut nannut qanillattortartut amerliartorput. Taamaattoqartillugulu inuit nannullu akerleriittarnerat annikillisinniarlugu WWF maanna illoqarfiup innuttaasa suut aaqqiissutitut ujarneraat paasiniarlugit innuttaasunik ataatsimiisitsipput.
Illoqarfinnut qanilligaluttuinnarput
Innuttaasunik ataatsimiisitsinissaq maajip tallimaani atuarfiup inersuaani unnukkut arfineq marluniit qulingiluap tungaanut pissaaq.
Ajornartorsiut siornatigut WWF-p nalunaarummini "på tynd is"-mi eqqartoreernikuuat, maluginiaqqullugulu aasamut suli ajornartorsiutaanerussasoq, nannussinnaanermut pisassiissutit nungoreermata, sikkorlunneratalu nannut nerisassanik ujarlernerminni nunakartimmagit.
Alaatsinaattut aqerlullu gummiusut
Nunavummi Alaskami Canadamilu ilaatigut nannunut alapernaarsuutit pilersinneqarput, kalerrisaarillutik eqqarlutik aqerlunik gummiusunik eqqorlugit nannunik qimaasitsisartunik. Soorlu aamma qimmit nerukkaatissaat containerinut immikkut ittunut toqqortiterisarput, nannut illoqarfimmut qanillattornissaat angutsaaliorlugu, allallu iliuuserisat pinaveersaartitsissutit atorneqartarput.
Aamma atuaruk Qaanaap eqqani nannut mianersorfigikkit
Aamma atuaruk Ilisimatuut nannut angalaartarfiimik misissuilersut
Pinngortitaq pillugu nunarsuaq tamakkerlugu suliniaqatigiiffiup innuttaasunik ataatsimiisitsinerminni illoqqortoormiuni periutsit assingi atorneqarsinnaanersut paasiniassavaat, imaluunniit aaqqiissutissat allarluinnaat atuutsinneqalissanersut.
