Ironbark Citronen Fjordimi aatsitassarsiorniarunnaartoq

Aatsitassarsioqatigiiffik Ironbark Zink Citronen Fjordimi maanna aatsitassarsiorfiliorniarsariunnaarpoq.

USA-mi aningaaserivimmit, Exim-imit, 4,3 milliardit koruuninik aningaasaliiffigineqarnissamut pilersaarut qulakkeereeraluarpaat.

Suliffeqarfiulli suleqataasunit allanit pisariaqartitaminik aningaasaleeqataatitsiniarnini iluatsinngilaa.   

Ironbark A/S pinngitsaaliissummik maanna atorunnaarsitaaleruttorpoq.

Tusagassiorfik Finans taama allappoq

Aatsitassanut naalakkersuisup Naaja Nathanielsenip (IA) matusinerup aatsitassarsiornermut qanoq sunniuteqassanersoq maanna oqaaseqarfigaa.

Periarfissat tamarmik ujartorneqartut

Arnap politikkikkut akisussaaffillip nutaarsiassaq tupaallaatiginngilaa.

Tamanna naalakkersuisoqarfiup suliffeqarfiup sulineranik malinnaaffiginnilluarsimaneranik pissuteqarpoq.

- Tamanna ajoraluartumik tupaallaatigivallaanngilarput. Qanoq pisoqalernera nalunngilarput, kisianni soorunami iluatsissinnaanissaa neriuutigigaluarparput, Naaja Nathanielsen oqaluttuarpoq.

Aatsitassanut naalakkersuisoq Naaja Nathanielseni isumaqarpoq tamanna Kalaallit Nunaanni aatsitassarsiornermik soqutiginnilernissamut sunniuteqarnavianngitsoq. Assi © : KNR, Henriette Simonsen

Piiaaffiup ukiuni 14-ini ingerlaannarnissaa minnerpaamillu 500-nik suliffissaqartitsinissaa, nunattalu karsianut 2,6 milliardit koruuninik isertitaqarfiunissaa, sulisuniillu akileraarutitigut 2 milliardit koruuninik isertitaqarfiunissaa, Ironbarkip naatsorsuutigigaluarpaa.

Aatsitassarsiornermi suliniuterujussuaq pineqarpoq. Tamanna Kalaallit Nunaanni aatsitassarsiornermik soqutiginninnermut qanoq sunniuteqassava?

- Sunniuteqangaannginnissaa neriuutiginarpoq. Suliniut ungasissorujussuarmi inissisimasoq assartugassallu aqqutissarsiornerata tungaatigut ilungersunartulik pineqarpoq. Tamanna ilisimavarput, Naaja Nathaanielsen oqarpoq.

Piiaaffik nunatta avannarpasinnerpaaffiata ilaani, allorniusaq sanimukartumi 83 gradip missaaniippoq.

Aatsitassarsiorfik ukioq naallugu atorneqarsinnaagaluarluni umiarsuarmik ukiukkut marloriarluni taamaallaat tikinneqarsinnaavoq.

Citronen Fjordimit aatsitassap assartornissaa ilaatigut ajornakusoortitsisinnaavoq, aatsitassiorfimmut aningaasaliisinnaasunik ilassarsiorneq tamatumunnga aamma ajornakusoortitseqataalluni. . Assi © : Naalakkersuisut

Paasissutissaat KNR-imit pissarsiarineqartut naapertorlugit, suliniut uniinnannginniassammat, piginnittuusimasut soqutigisaqaqatigiillu allat  attaveqarfigineqarput.

Aqqutissarsiornerulli tungaatigut pissutsit aatsitassallu akukikannernera pissutigalugit, soqutiginnittoqanngilaq.

Naaja Nathanielsenili isumaqarpoq tamanna Kalaallit Nunaanni aatsitassarsiornermik soqutiginnilernissamut sunniuteqarnavianngitsoq.

- Akerlianilli aatsitassarsiornermut aningaasaliinissamut soqutiginninneruleriartortoqarnera malugisinnaavarput. Nuna tamakkerlugu suli soqutiginnittoqarpoq. Taamaattumik Ironbarkip akuersissutertik utertikkaluarpassuk suli soqutiginnittoqarnissaa naatsorsuutigaara.

- Susassaqarfiuvoq arriitsumik siuariartorfissatut naatsorsuutigineqartariaqartoq. Susassaqarfiunngilaq piffissap sivikitsup ingerlanerani allannguuterpassuaqarfiusoq. 

Matunissaanut pilersaarut

Sumiiffimmi nunap pisuussutaata suneqarnissaa suli nalunarallarpoq.

Suliffeqarfiup matunissani maanna pilersaarusiorpaa torersaanerlu aallartillugu. 

-Tamanna pereerpat, sumiiffik qanoq pineqassasoq, neqeroortoqaqqissanersorlu siunissami paasinarsissaaq, Naaja Nathanielsen oqarpoq.

Naalakkersuisulli aatsitassarsiorfiit avannarpasinnerit pillugit aatsitassarsiorsinnaannginnermik naliliinissaq siusippallaarnerarpaat.

-Suliniuterujussuupput, taamaattumik Citronenip Kangerluani aatsitassarsiornerup iluatsinnginnera, avannarpasinnerni aatsitassarsiornerup iluatsissinnaannginneranik isumaqanngilaq.

-Isumalluutit suut pineqarnersut, sumiinnersut qanorlu piumaneqartiginerat apeqqutaapput.

Suliniummit suut ilinniutaappat?

-Nunamik misissuisarnerni ilisimaareriigarinngisatsinnik ilisimasaqalerpugut. Soorunami paasissutissat toqqorneqartut tammarnavianngillat. Sumiiffimmi ilisimasaqarnerulerpugut. Tamanna siunissami iluaqutigissavarput.

Taama suliniuteqartoqaannanngilaq, Naalakkersuisummi suliffeqarfiutillit aningaasaqarnerannik ukiorpassuarni ikiuuttarput, taamalu sulineq ingerlaannassaaq.

-Periuseq nangillugu aatsitassanik eqqussisartunut, Kalaallit Nunaannik niuerniarunik suleqatigiinneq qanimut ingerlanneqartartoq ersarissarneqassaaq. Aallartisarneq teknikkikkut aningaasatigullu akisusarmata.