Ironbark nunatta avannaani zinkimik piiaanissamut aningaasaliiffigineqartoq
Australiamiut aatsitassarsiutileqatigiiffiat, Ironbark Citronen Fjordimi aatsitassarsiorniarnermik annertuumik suliaqartoq USA-mit milliardilikkaanik aningaasaliiffigineqartussanngorpoq.
Amerikamimi naalagaaffiup aningaaserivia, The U.S Export-Import bank Iranbarkimut 4,3 milliardit koruuninik atukkiinissamut piareersimavoq.
Billede: Naalakkersuisut
Nittartakkatigut tusagassiorfik Altinget Arktis taama allaaserisaqarpoq.
Ironbrak nunatta avannaata kangisissuani, Citronen Fjordimi zinkinik piiaanissamut 2016-imi akuersissuteqarfiuvoq. Isumaqatigiissummi tassani Kim Kielsenip (Siumut) naalakkersuisuutitaqarnerata nalaani aatsitassanut naalakkersuisuusoq, Múte B. Egede atsiortuuvoq, taannalu maanna Naalakkersuisut siulittaasoralugu.
AAMMA ATUARUK Amerikamiut aningaaseriviat Citronen Fjordimut milliardinik aningaasaliinissamut piareertoq
Aatsitassarsiutileqatigiiffiup amerikamiut aningaaseriviat suleqatigalugu milliardinik atornissamut tunngatillugu qanoq pilersaarnermik 2020-mi nalunaaruteqarput, tamannalu maanna iluatsippasippoq.
Ironbarkip aatsitassarsiorfiup sanaartornissaa 3,3 milliardit koruuneqarnissaa naatsorsuutigaa. Ukiunilu 14-ini aatsitassarsiortoqarnissaa ikinnerpaamillu 500-nik suliffissaqarnissaa anguniagaavoq.
Altinget Arktis naapertorlugu Citronen Fjordimi aatsitassarsiorneq nunarsuarmi zinkisiorfinni annerpaat qulit akornanniilersinnaasoq Ironbarkip pappialanik nalilinnik niuffaffimmi nalunaarutigaa. Zinkilu maanna akigissaartoq, aatsitassarsiutileqatigiiffiup ilanngullugu oqaatigaa.
Aatsitassarsiutileqatigiiffiup nammineq oqarnera naapertorlugu Ironbarkip piginneqatigiiffimmit sinneqartoorutiniillu agguagarsianik akileraarnikkut 2,6 milliardinik nunatta karsianut iluanaaruteqartitsinissani naatsorsuutigaa. Tamatuma saniatigut Ironbark sulisut akileraartarneratigut 2 milliardit koruuninik nunatta karsianut aamma iluanaaruteqartitsiniarpoq.
