Australiamiut aatsitassarsioqatigiffiat, Ironbark nunatta avannaata kangiani Citronen Fjordimi zinkinik piiaanissamut 2016-imi akuersissuteqarfigineqarpoq.

Aatsitassarsioqatigiiffik amerikamiut naalagaaffiata avammut aningaasaliinermi aningaaserivia, The U.S. Export-Import Bank 1,37 milliardit koruuninik atornissamik siunerfigisamut nalunaarummik atsioqatigiissuteqarfigaa. Nittartakkatigut nutaarsiassaqartitsivik, Altinget Arktis taama allaaserisaqarpoq.

Tamanna aatsitassaqarnermut naalakkersuisoqarfimmi pisortap, Jørgen Hammeken-Holmip nuannaarutigalugu uppernarsarpaa.

AAMMA ATUARUK Mineselskab skærer ned på efterforskning

Suliffeqarfiup Citronen Fjordimi ukiorpassuarni aallussinera aamma nunarput ataatsimut isigalugu nukittorsarpai. Nunatsinni pisuussutinik piiaaniarnermi siuttuusutut Citronen Fjord nunatta inuussutissarsiornikkut tunngaviata piffissami sivikitsumi assigiinngisitaartunngortinnissaannut periarfissaavoq nunanillu allaniit aningaasaleerusuttunut pilerinarsaataalluni, taanna Altingetimut oqarpoq.

Ironbarkip aatsitassarsiornissamut sanaartornissaq 3,3 milliardit koruuninik akileqarnissaa naatsorsuutigaa.

Ukiuni 14-ini aatsitassarsiortoqarnissaa suliffissanillu ikinnerpaamik 500-nik pilersitsinissaa anguniaavoq.

Altinget Arktisip allaaserisaa naapertorlugu Ironbarkip aatsitassarsiorneq ammassanerlugu ammassannginnerluguluunniit aappaagu aalajangiiffigissavaa.