Aatsitassarsiorfiup misissuinissani ikilisikkai
Aatsitassarsiorfiup Ironbarkip aningaasartuutini annikillivai, taamaammat suliffeqarfiup misissuinissamut akuersissutit tigummisani arfineq-marluk Namminersorlutik Oqartussanut utertippai.
Australiamiut nutaarsiassaqartitsiviat, The Market Herald taama allaaserisaqarpoq.
Aatsitassanut naalakkersuisoqarfimmi pisortap, Jørgen T. Hammeken-Holmip Ironbarkip misissuinissamut akuersissutini utertikkai KNR-imut uppernarsarpaa.
AAMMA ATUARUK Múte B. Egede Citronen Fjordenimut takusaasoq
- Nalinginnaasorujussuuvoq. Suliffeqarfik misissuisinnaavoq, imaluunniit akuersissutit utertissinnaavai, Jørgen T. Hammeken-Holm oqarpoq.
Misissuinermut 18,5 millionit missaannik naleqartumik iperagaqartoq
Aningaasanik nalilinnik niuffaffimmut nalunaarut naapertorlugu Ironbarkip akuersissutinik utertitsinini australiamiut aningaasaataannik 3,95 millionit dollarsit missaannik (18,5 millionit koruunit missaat) sipaaruteqassaaq.
Suliffeqarfiup akuersissutinik utertitsinermi kingunerisaanik Kalaallit Nunaata avannaani Citronen Fjordimi aatsitassarsiornissamut ineriartortitsinissaminik ukkataqarnerulissasoq, Ironbark Zincimi pisortaq, Michael Jardine The Marked Heraldimut oqarpoq.
AAMMA ATUARUK Ironbark Citronen Fjordimi aatsitassarsiornissamik akuersissummik tunineqartoq
Suliffeqarfimmi tassani piiaanissamut suli akuersissuteqarfiuvoq, suliffeqarfik zinkimik aqerlumillu piiaaniarpoq.
Misissuinissamut akuersissutit utertinneqartut arfineq marluusunit pingasut Citronen Fjordimi misissuinissamoorput, pingasut Mestersvigimut ataaserlu Washington Landimut.
Jørgen T. Hammeken-Holmip oqarnera naapertorlugu misissuinermik suliaqarneq Ironbarkip sumiiffinni suliareriigai maanngaannartinneqarnavianngillat:
- Qillerinerit paasissutissallu katersorneqartut taakku qulakkiissavagut. Paasissutissat allanut soqutiginnittunut pissarsiarineqarsinnaatinneqalissapput. Suliffeqarfiit allat taamaalillutik Ironbarkip killiffigisaanik nangitsisinnaassallutik, Ironbarkimi pisortaq oqarpoq.