Irlandimi Skotlandimilu anorersuarnerani angallattoqaqqusaassanngitsoq atuarfiillu matoqqassasut

Anorersuaruarujussuaq Eowyn Irlandimut ullumi anngummat Irlandip oqaluttuarisaanerani aatsaat taama sakkortutigisumik anorlernera uuttortarneqarpoq.

Irlandimi silasiortut inoqatinut attaveqaqatigiittarfikkut X-ikkut taama allapput.

Anori akunnermut 183 kilometeritut sakkortutigisoq Irlandimi ullaakkut nalunaaqutaq tallimanngortoq Irlandip kimmut sineriaani illoqarfimmi Galwayimit uuttortarneqarpoq, tassa sekundimut 50,8 meteritut sakkortutigaluni.

Skotlandimi Irlandimilu inuit 4,5 millionit anorersuarnissaanut mianersoqqussummik oqarasuaatitigut siuninngua tunineqarput.

Nutaarsiassaqartitsivik AFP taama allaaserisaqarpoq.

Tuluit tv-qarfissuata BBC-p allaaserisaa naapertorlugu tuluit oqartussaasuisa oqaatigaat anorersuarnerata nalaani angallanneq ulorianarsinnaasoq.

Illut suliffeqarfiillu millionit affaat sinnerlugit innaallagiaaruttut nutaarsiassaqartitsiviup Reutersip taassuma saniatigut allaaseraa.