Pisortatigoortuunngitsumik erfalasulernissaq taperserneqartoq: Soorunami tapersiivugut

Ullumikkut erfalasulernissamut qaammatisiutini allassimasoqanngilaq. Ullorlu nalinginnaasuulluinnarpoq.

Tamannali naalakkersuisut siulittaasuata, Múte B. Egedep (IA) allanngortissimagaa oqaatigineqarsinnaavoq. Erfalasorpummi ullumikkut sumi tamaani erfalavoq. Tamanna Múte B. Egedep ippassaq kaammattuuteqarneranik pissuteqarpoq.

”Nunarput pillugu piffissami kingullermi pisut aallaavigalugit, inuiattut ataatsimoornissarput aatsaat taamak pingaartigaaq. Ataatsimoornerpullu takutinniarlugu kaammattuutigaara, tallimanngornermi 24. Januar 2025, Erfalasorput amusinnaagit - Nunarput pillugu ataatsimoorta”, kaammattuutaani allassimavoq.

Air Greenlandimilu tamatumunnga isumaqataalluinnarput:

- Naalakkersuisut ataatsimoornermik takutitsinissamik kaammattuuteqarpata, taama soorunami taamaaliussaagut, pisortaq, Jacob Nitter oqarpoq.

- Nunarput, suliffeqarfipput erfalasorpullu tulluusimaarutigaagut.

- Nunarput nunarsuarmi tamarmi maanna soqutigineqangaatsiarlunilu tatineqarpoq. Pisumi tassani ataatsimoornissarput nunatsinnullu tapersiinissarput pingaaruteqarpoq. Takugakku nuannaarutigilluinnarpara, tulluusimaarnitsinnimmi takutitsinissamut periarfissaqarpugut.

Namminersorlutik Oqartussat ingerlatseqatigiiffianni allami, KNI-mi Erfalasorput toqqukkat akornannit ullaaq manna aamma amuneqarpoq.

- Tassa ataatsimoornerput takutinniarlugu naalakkersuisut kaammattuutigaat inuiattut ataatsimoornerput takutillugu erfalasorput ullumikkut amuneqassasoq, uagullu maani kiffartuussivimmi KNI-mi aamma taamaaliorpugut, attaveqaqatigiinnermut pisortaq, Juliane Henningsen Heilmann oqarpoq.

Meeqqanut 100 dollarinik agguaasut

Kalaallit Nunaanni Politiit Namminersorlutik Oqartussanit pigineqanngillat. Taamaakkaluartorli politeeqarfiit erfalasulerfianni erfalasorput seqinertut aappaluttut sikutullu qaqortut erfalatinneqartut, pisortaq, Bjørn Tegner Bay oqarpoq.

- Ataatsimoornissamut oqariartuuteqarneq taama pingaaruteqartigisoq uagut aamma taperserparput, taanna KNR-imut oqarpoq.

Sooruna?

- Sapaatini akunnerni kingullerni pingasuni sisamani ilaatigut inoqutinut attaveqaqatigiiffitsigut oqallinneq ilaatigullu illoqarfimmi pisut pinerluuteqarnermut tunngassuteqanngikkaluartut maluginiarpakka… kisianni innuttaasutut politiitullu inuiaqatigiinni akerleriinnermi avissaartuuttoqartoq maluginiarpara. Taamaammat naalakkersuisut ataatsimoornermik takutitsinissamut kaammattuuteqarneranni tapersiissasugut politiini isumaqarpugut.

Illoqarfimmi pisut suuppat?

- Nunanit allanit inoqutinut attaveqaqatigiiffitsigut ilisimaneqarluartut maanngarlutik angajoqqaanik oqaloqateqaqqaaratik meeqqanut 100 dollarsikkaanik agguaasoqarpoq.

Ataatsimoorneq qanoq ittoq taperserusuppisiuk?

- Oqaaseq ataatsimoorneq tassa ima paasivara isummanik assigiinngissuteqaratta assigiinngitsumik isumaqartugut akuerissagipput. Sapaatini akunnerni kingullerni oqallinneq akunneqarsinnaajunnaartoq maluginiarpara taamaammat ataatsimoornermik pilersitsinissaq pingaaruteqarpoq.

Tusass aamma erfalasulisarpoq, illoqarfiillu pingaarnersaata avataani immikkoortortaqarfiit erfalasulernissaannik aamma piumaffigineqarput. Illoqarfiit pingaarnersaanni bussit ullumikkut aamma erfalasulisarput.