Meeqqat oqaaseqartartuat nalunaarusiaq pillugu: Inuusuttut tusaaneqanngillat

Meeqqat Illersuisuat MIO, Aviâja Egede Lynge, imminut toquttarnermut pinaveersaartitsinissamik Naalakkersuisut pilersaarusiaat qanittumi saqqummiunneqartoq uparuarpaa. Inuusuttut naammaginartumik tusaaniarneqanngillat.

Allattoq Akitsinnguaq Olsen

maajip 22-at 2023 07:12

- Inuusuttut 40-nik innersuussuteqarput. Ajoraluartumillu oqartariaqarpunga inuusuttut tusaaneqarsimanngillat.

Kalaallit Nunaanni imminut toquttarnermut pinaveersaartitsinissamik Naalakkersuisut nutaamik pilersaarusiaasa missingiusiaat Meeqqat Illersuisuata, MIO-miit Aviâja Egede Lynge-p, taama oqaaseqarfigaa. Inuusuttullu kingusinaannginnermi ikiorneqartarnissaat minngerunngitsumik amigaatigaa:

- Tarnikkut atugarliuutaasut kingunerluutillu imminut toquttarnermut toqqammaviukkajunnerusartut iliuuseqarfigineqarnissaat annertoqisumik amigaatigaara, KNR-imut oqarpoq.

Iliuusissatut pilersaarut ukiarli saqqummiunneqartussaagaluarpoq, sulianilli ingerlatsiviit sulianillu ilisimasaqartut sammineqartoq pillugu isummersuutaasa ilanngunneqarnissaat periarfissinniarlugu kinguartinneqarsimalluni.

Aamma atuaruk Kalaaleq inuusuttoq: Imminut toqunneq pillugu oqaluuserinninnermut pikkorinnerulissaagut

Ilaatigut MIO-p suliaa Qamani, tigussaasunik siunnersuusiorfigineqartoq, imminullu toquttarneq pillugu iliuusissatut pilersaarusiamut nutaamut aamma atsiunneqartoq.

Tarnillu nappaataasa sunniutai pillugit imminut toquttarnerup unitsinneqarnissaani oqaatsimik ataasiinnannguamilluunniit taaneqannginnera tupigusuutigaa. Inuttut pisinnaatitaaffinnut institutti-mit, Institut for Menneskerettigheder, tusarniaanermi akissuteqaatigisaminni iliuusissatut pilersaarusiami uparuaatigisaasa ilagaat.

- Ilungersunarluinnartuuvoq. Inuusuttummi nammineq aamma taannarpiaq eqqartorpaat. Tarnikkut nakorsarneqarluni ikiuisoqartarnissaa nilliaatigaat. Apeqqutigaallu sooq imminut toqoriarsimanerup kingorna aatsaat ikiorserniarneqartarnerlutik.

INUUSUTTUT NAMMINNEQ SAKKUSSAMINIK NOQQAASSUTEQARTUT

INUA AAMMA Ungdommens Røde Kors inuusuttut tarnikkut atugarisaannik pitsanngorsaaniarlutik ukiut arfineq-marluk sinnerlugit suleqatigiipput.

Meeqqat Illersuisuanit, MIO-mit nalunaarusiaq Qamani 2022-mi septembarimi saqqummerpoq, tassanilu inuusuttut 14-init 25-nut ukiullit nunatsinni imminut toquttoqartarnerata qaffasinneranik qanoq appassaaniartoqarsinnaaneranut oqariartuuteqarput.

Inuusuttut nalunaarusiami tassani imminnut ikiornissaminnut sakkussanik pisariaqartitsillutik erseqqissaatigaat. ’Inuusuttut ikinngutiminnik aliasuttunik imaluunniit imminut toqunnissamik eqqarsaateqartunik qanoq oqaloqatiginnissanerminnut sakkussaminnik kissaateqarput’, innersuussutini ilaatigut allassimavoq.

Nunatsinni inuusuttut imminnut toqoriaraluarnikuusimasut 15 procentiinnaat tarnip pissusianik ilisimasalimmik ikiorneqarnikuusimasut, Statens Institut for Folkesundhedimit nalunaarusiap takutippaa. Inuusuttullu tassunga taarsiullugu artorsaateqaraangamik ikinngutiminnut ilaquttaminnullu saaffiginnikkajupput.

Suliniut Nordeap aningaasaateqarfianit 6 millionit koruunit missaannik aningaasaliiffigineqarpoq, saniatigullu Folketingip partiivisa danskit 2023-mut aningaasanut inatsisissaanni Atlantikup avannaanut aningaasaliissutinit 6 millionit koruuninik aningaasaliiffigineqarluni.

Allisiguk

Kinguaariit tulleriinni uteqqiassinnaavoq

Imminut toquttarneq soorunami meeqqanut inuusuttunullu inuunerminni misiginikuusimatillugu sakkortunerpaasinnaasartoq Aviâja Egede Lynge oqarpoq. Aammattaarli inuiaqatigiinni ajornartorsiut sukkanerpaamik iliuuseqarfigineqanngippat annertusiartuinnavissinnaasoq:

- Inuiaqatigiinni ajornartorsiut annerpaajusoq oqartariarpugut tamattalu kivitseqataaffigisariaqarparput. Kinguaariinni ingerlaartarpoq unitsinnissaalu iluatsissimanngilarput. Kisitsisit taamaaginnarput, ajorarluartumik, Aviâja Egede Lynge oqarpoq nangillunilu:

Aamma atuaruk Ukiuni sisamani suliniut nutaaq: Kalaallit inuusuttut tarnikkut ikiueqqaarnermik ilinniassapput

- Isumaqarpunga Naalakkersuisut inuusuttunik tusarnaartariaqartut, sapiisingaarlutik inuunerminni ajornarnerpaanik oqaluttuarmata, qanorlu iliornikkut pitsanngorsaasoqarsinnaaneranik aamma tusarliimmata. Tusaasigit!

Illit nammineq ikiorseqarnissamik imaluunniit imminut toqunnissamik eqqarsaateqaruit, Tusaannga-mut sianerit 801180-imut.