Kalaaleq inuusuttoq: Imminut toqunneq pillugu oqaluuserinninnermut pikkorinnerulissaagut
Kalaallit Røde Korsiat nunatsinni inuusuttut inuunermi artornartunut pingaartumik imminut toqunnermut tunngatillugu oqaluuserinninnissaannut pikkorinnerulersitsisussamik tarnikkut ikiueqqaarnermik suliniummik nutaamik aallartitsivoq.
Suliniut nalunaarusiamit Qamani-mit MIO siorna suliarisaanik aallaaveqarpoq, nalunaarusiami tassani kalaallit meeqqat inuusuttullu amerlasuut ulluinnarminni unammillernartitaanik apersornerneqarput.
Linda Lyberth Kristiansen nammineq avatangiisimilu ajornakusoortitaanik inuusuttut oqaluttuartut ilagaat.
Taassuma tarnikkut ikiueqqaarnissamut suliniut nuannaarutigaa, eqqarsaatillu artornarneranni oqaloqatigiinnissamut maanna sakkussaqalernissaa qilanaaraa – tamannami pisariaqartilluinnarneqarpoq:
- Taama eqqarsaateqaraanni sumukartoqassava? Atugarlioraanni qanoq iliornissaq ajornakusoorsinnaavoq, sakkussaqanngilagummi. Taamaammat tarnikkut ikiueqqaarneq timikkut ikiueqqaarnertulli pingaartigilissaaq – tamannami inuunermik annaassaqarnermik kinguneqarsinnaavoq.
Imminut toqunnissamik eqqarsaateqarneq soorunami taama eqqarsaateqartunut oqimaannerpaasarpoq. Kisianni aamma inuiaqatigiinni ajornartorsiutaavoq, Linda Lyberth Kristiansen oqarpoq.
Amerlasuunimi – pingaartunilli inuusuttuni eqqarsaatit artornartut initoorujussuusarput. Inuusuttut 18-init 29-nut ukiullit pingajorarterutaasa missaa piffissap ilaani imminut toqunnissaq eqqarsaatigisimagaat tallimararterutaat imminut toqoriarnikuusimasut kisitsisit kingulliit takutippaat.
Taamaammat nunatut ajornartorsiummik ilungersuussinissaq pingaaruteqartoq, Linda Lyberth Kristiansen isumaqarpoq:
- Inuiaqatigiinni imminut toquttoqartarnera ajornartorsiutaaguni taava nassuerutiginninnissaq pingaaruteqarpoq. Inuiaqatigiit kivitseqatigiinnissaat pignaaruteqarpoq. Alloriaqqittoqassaguni tamakku oqaluuserineqarnissaat nalinginnaasunngorsarneqartariaqarput.
Oqaluuserinninneq oqallisiginnissinnaanngortitsissasoq
Linda Lyberth Kristiansenip inuusuttoqatimi akornanni oqaluuserinninnermut pikkorinnerusoqarsoraa – kinguaariillu siuliini tamakku oqimaatsut nipangiusimaneqarnerullutik. Kisianni oqaluuseriinnarnissaat naammanngitsoq, taanna oqarpoq.
- Kisianni imminut toqunnissap pinaveersaartinneqarnissaanut iliuuseqartoqarnerusariaqarsoraara. Oqaluuserinerussavarput. Kisianni oqaluuseriinnarnagu. Aamma qanoq iliornissaq ilisimaneqassaaq, taamaammat tarnikkut ikiueqqaarneq tamatsinnut iluaqutaangaatsiassasoraara.
Taassuma suliniutip aallartilernera nunatsinnilu inuusuttut ajornakusoortunik oqaluuserinninnissamut pikkorinnerulissanerat nuannaarutigaa. Taassumalu tamanna oqimaatsunik eqqarsaateqarnernik annikinnerulersitsinissaa neriuutigaa.
Ajornartorsiuteqaruit imaluunniit imminut toqunnissamik eqqarsaateqaruit Tusaanngap oqarasuaataanut 80 11 80-imut sianersinnaavutit.
Aqqulli suli takivoq, kisianni kalaallit qanoq siuariartoqartigisimanera qanorlu nukittutiginerlutik eqqaamassavaat:
- Ikiortissarsiorneq sanngiitsuunertut isigineqarunnaarluni muminneqarluni ikiortissarsiorneq sapiitsuliornertut isigineqalissaaq.
