Innuttaasunik misissuititsineq: Inuusuttut tarnimikkut peqqissusaat sammineqassaaq

Nunatsinni inuusuttut tarnimikkut qanoq peqqitsigaat?
Innuttaasunik misissuititsinermi tamanna akineqassaaq.

- Pingaaruteqaqigami inuusuttortatta oqariartuutaat qanorlu ulluinnarni atugaqartut qanorlu inuuneqarnersut, inuusuttut tusaasariaqaratsigit, Ingelise Olesen misissuititsinermi aqutsisuusoq oqarpoq.

AAMMA ATUARUK Innuttaasut 2.800-t peqqissutsimik misissuinermi peqataassasut

Innuttaasunik misissuinermi timikkut tarnikkullu peqqissuseq paasiniarneqarpoq. Inuusuttunik 15-init 17-it tikillugit ukiullit tarnimikkut peqqissusaata immikkut sammineqarnera, misissuinerup nutaartarivaa.

- Immikkut sammineqarpoq ulluinnarni atugaat aammalu atuarfimmi atukkat allallu, Ingelise Olesen oqarpoq.

Apeqqutinik aalajangersimasunik ilisimatuussutsikkut atorneqartartunik inuusuttut tarnimikkut peqqissusaat paasiniarneqarpoq. Akissutillu tunaartaralugit inuusuttup tarnimigut peqqissusaa nalilerneqassalluni.

Inernerit suliniarnermut atorneqassapput

Misissuinerup inerneri peqqinnerulernissamut suliniarnernut atorneqassapput. Ilaatigut inuusuttut tarnimikkut peqqissusaannut.

Innuttaasunik misissuititsineq 2018-ip naanerani naammassissaaq. Nunatsinni Peqqissusermik Ilisimatusarfimmit, Innuttaasut peqqissusaannik Naalagaaffiup misissuisoqarfiata ataaniittumit innuttaasut nunaqarfimmit qulit illoqarfinnillu qulit 2.800-t missaanniittut misissorneqassapput.

1993-imiit tallimassaanik innuttaasunik misissuititsisoqarpoq.