Innuttaasut 2.800-t peqqissutsimik misissuinermi peqataassasut
Misissuinermi ilaatigut sukkorneq, pujortartarneq pualavallaarnerlu misissuiffigineqassapput, aamma inuusuttut tarnikkut peqqissusaat misissuiffigineqassaaq.
Misissuineq aallartinneqaqqammerpoq Nunatsinnilu Peqqissusermik Ilisimatusarfimmit, Innuttaasut peqqissusaannik Naalagaaffiup misissuisoqarfiata ataaniittumit ingerlanneqarluni.
Ilisimatuut illoqarfiit qulit nunaqarfiillu qulit, tassanilu innuttaasut 2800-it tikeraassavaat. Innuttaasut misissuinermut peqataatinneqartut ilaatigut oqimaalutarneqassapput, aammik quumillu misissugassanik tigusiffigineqarlutik aamma puaat misissorneqassapput aavisalu naqitsinerat uuttortarneqassalluni. Ilisimatusarfik tusagassiorfinnut nalunaarummi taama allappoq.
Aamma peqataasut 35-t sinnerlugit ukiullit sukkornersut sukkornermullu aallanersaateqarnersut misissorneqassaaq.
- Innuttaasut peqqissusaannik misissuinermi kingullermi paasineqarpoq Kalaallit Nunaanni inersimasut 57 procentii ullut tamaasa pujortartartut, pualavallaartut 1993-imiilli marloriaatinngorsimasut 7 procentillu sukkortut inuillu tallimaagaangata ataaseq sukkornissamut aallernersaateqartoq, Christina Viskum Lytken Larsen, Nunatsinni Peqqissusermik Ilisimatusarfimmi ilisimatooq pisortarlu taama oqarpoq.
Misissugassatut tigusat nukinginnartunik paasisaqarfigineqassappata peqataasut nakorsiartarfeeqqamut napparsimmavimmulluunniit erngertumik innersuunneqassapput. Peqataasut misissugassanik tigusiffigineqatut tamarmik kingusinnerusukkut allakkatigut akissutinik nassinneqarumaarput. Aamma paasissutissat tamaasa katersorneqassapput nunatsinnilu peqqinnissamut oqartussanut nalunaarutigineqarlutik.
Nunatsinni Peqqissusermik Ilisimatusarfik Nunatsinni innuttaasut peqqissusaannik 1993-imiilli tallimassaanik misissuivoq, misissuinerlu peqqissutsimut naalakkersuisoqarfimmit aningaasalersugaavoq.
