Inuusuttut pitsaanerusunik atugassaqartittariaqarpagut

Tamatumunnga peqqutaasinnaasut arlaqarput, inuusuttulli ilinniagaqanngitsoortarnerinut atornerluineq peqqutaasut ilagilluinnarpaat. Angajoqqaanit tapersersorneqannginneq meeqqamut sakkortuumik eqquisinnaavoq inuuneratalu sinnerani sunniusimasinnaalluni.

-Inuusuttut sanngiinerusumik alliartortartut inuttut misigissutsikkut innarligaanermikkut nukissatik pitsaasumut atugassaraluartik inuunermut ajornerusumut atortalersarpaat, soorlu ukununnga: Imigassamik ikiaroornartumillu atuisalerneq aamma atornerluisalerneq. Tamakku atussagaani akiliuteqartariaqarput, akissaqanngippatalu aammalu nerissappata taava pinerlunnerit aqqutigilersarpaat. Soorlu tillinniarnerit. Tillinniarnerit assigiinngitsut taaneqarsinnaapput; niuertarfinni, angerlarsimaffinni, suliffeqarfinni ilami sumiluunniit. Uani pingaarnerutittarpaat nalilinnik tillikkunik tuneqqissinnaasariaqarlugit akissaqassagunik. Tamannalu pinaveersaartinnissaanut annertuumik suliniutigisariaqarparput. Inuiaqatigiiusugut tamatta akisussaaqataanerput paasisariaqarparput, tassalu tillitaasinnaaneranik pisinaveernikkut, Terkild Huusum – Isaksen, IA sinnerlugu Kommuneqarfik Sermersuumi kommunimut qinigassanngortittoq isumaqarpoq.

Inuusuttut sanngiinnerusumik alliartortartutut taasat ilinniassappata, Piareersarfiit aqqutigisariaqassavaat, tassanilu karakterinik qaffassaanissaminnut ingerlariaqqinnissaminnullu periarfissinneqassapput. Piareersarfinnili inissat killeqarneri ajornartorsiutaasupilussuuvoq. Inuusuttorpassuit katataanerannik tamanna kinguneqarsinnaavoq.

-Inuusuttut qulaani eqqartukkavut amerlasuut aamma Specialklasseni atuartuusarput, taakulu karaktereqaratik atuarunnaaraanngamik periarfissaat annikinnerusarluni. Ullumikkut Piareersarfimmut qinnuteqassagaani periarfissatuaavoq 1. Marts. Ukiamut aatsaat atualernerit pisarput, tigutissimagaani. Tigutissimanngikkaani taava aatsaat aappaaguani periarfissinneqartarput allamik pisoqanngippat. Tamannalu inuiaqatigiinnut akisunaarsinnaavarput, pissutigalugu inuusuttoq sanngiinerusoq allamik sammisaqartinniagassaq, soorlu suliffissarsiuvinikkut ajornartarsinnaammat suliffeqarfiit inuusuttunik tigusisinnaanerat killeqarsinnaasarmat, Terkild Huusum – Isaksen oqarpoq, taassumalu ilanngullugu kaammattuutigaa ukiumut marloriarluni Pareersarfinni atuartussanik tigusisoqartalissasoq.