Inuusuttut namminneq kajumissutsiminnik suliaqarnerunissaat Siumut sinnerlugu qinigassanngortittup ujartoraa
Inuusuttut pisinnaasut, utoqqaanut isumassorneqartariaqartunullu allanut, sapaatip-akunneranut akunnerni marlunni atuarnerup nalaani inuiaqatigiinni kivitseqataanissamut atorneqartariaqartut, Vivian Motzfeldt isumaqarpoq:
- Maqaasisaqaara susassareqatigiinnerup iluani nammineq piumassuseq aallaavigalugu aningaasanik akilerneqanngikkaluarluni inoqatinut ikiuussinnaaneq. Politikikkut oqallinnermi suut tamarmik sumit aningaasartalerneqarnissaannik oqallinnerujussuup pigisatta aningaasanik nalilerneqarsinnaanngitsut matoortutut ittarpaat, Vivian Motzfeldt, tusagassiuutinut nalunaarummi ilaatigut taama allaaserisaqarpoq.
Inuiaqatigiinni kivitseqatigiinniarnermi inuusuttut kivitseqataasinnaanissaat, taassuma pissusissamisuuginnarsoraa, inuiaqatigiit pissutsit taamaaliornikkut pitsaanerulersinnaassammata:
- Takorlooruk inuusuttorpassuit ilinniarnerminnut atatillugu akunnerit marlualunnguit isumassuinermut atortalertuuppassuk nukissaq qanoq annertutigisoq pinngortissaneripput. Tamanna isumassorneqartup kisimi iluanaarutiginavianngilaa, eqqaamallugu tunisisoq tunisittumit pilluarnerusarmat, Vivian Motzfeldt, Siumut sinnerlugu Inatsisartunut qinigassanngortittoq oqarpoq.