Inuusuttut namminiilivinnissarput upperaat – Maannakkuunngitsorli

Inuusuttut namminiilivinnissaq pillugu paasissutissinneqarnerunissartik pisariaqartippaat. Maniitsumi Majoriami atuartut arlallit taama oqarput.

Allattoq Paalu Møller

februaarip 19-at 2025 15:51

Nutserisoq Steve Pedersen Hinrup

Namminiilivinnissaq Inatsisartunut qineqqusaarnermi inituvoq.

Taamaammat KNR-ip Majoriap Maniitsumi umiarsualiviup aqqutaani immikkoortortaqarfiani atuartut kisitsinermik ilinnialeruttortut pulaarpai.

Taakku nunatta namminiilivinnissaa kissaatigineraat aperaagut.

- Namminersulissagutta, Kalaallit Nunaat, eqqarsaatigivara siunissami qanoq ingerlanissaa. Taanna pissanngatigisarpara, siunissami qanoq ingerlariuseqassanersugut, Sofus Kristiansen oqarpoq.

Seri Lisa Petrussenillu isumaqatigigaa.

Kalaallit Nunaat massakkut namminersulissava?

- Naa.

Massakkuunngitsoq?

- Aap.

Kisianni namminersulertikkusuppat?

- Aap.

NAMMINIILIVINNISSAQ UKKATARINEQARTOQ

Inatsisartunut marsip aqqarngani qinersissaagut.

Namminiilivinnissaq qitiungaatsialeqqippoq, nunatta namminiilivinnissamut alloriarnermut tullermut ikaarsaarnissaa piffissanngortoq - USA-lu nunatsinnik aqutsinissamik soqutiginninneruleriartortoq - naalakkersuisut siulittaasuata Múte B. Egedep ukiortaami oqalugiarnermi oqaatigereeraalu.

Taamaammat KNR namminiilivinnissaq ukkataralugu sapaatit akunnerata massuma ingerlanerani arlalinnik nutaarsiassiissaaq.

Amerlanerussuteqartut maannakkut - nammiliivikkusunngitsut

Isummallu taakku KNR-ip nunatsinni ilinniarfeqarfinni ilinniartunut isumasiuinerani akissutinut assingupput.

Inuusuttummi isumasiuinermi akissuteqartut 46 procentiisa nunarput maanna namminiilivitsikkusuppaat, sinnerilu akerliullutik.

Isumasiuineq naatsumik

KNR-ip nunatsinni inuusuttut ilinniarfiini ilinniartut nunatta namminersulivinnissaa pillugu apeqqutinik qitiusunik marlunnik akisassartalimmik immersuisinnerisigut isumasiorpai:

Kalaallit Nunaat massakkut namminiilivissava?
Namminiilivinnissaq pillugu naammattumik paasissutissinneqartarlutit misigisimavit?

Nuummi, Sisimiuni, Ilulissani Qaqortumilu inuusuttut ilinniarfiini ilinniartut isumasiunermi peqataasut 192-iupput. Isumasiuineq ilisimatusarnermik aallaaveqanngikkaluartoq nunatsinnilu inuusuttut tamarmik isumasiorneqanngikkaluartut, tamatumunnga qanoq isumaqarnersut erserpoq.

Allisiguk

Nunarput namminiilivikkumaartoq Sofus Kristiansenip ilimagaa. Isumaqataanerlunili akerliunerluniluunniit qulakkeeqqanngilaa:

- Ilimagivara namminersulernissarput.

Illimmi aaliangissasuugukku, aaliangeeqataassaguit aappi naamiluunniit?

- Taannartaa eqqarsaatigivallaanngilara qanoq iliussanerlugu.

Namminiilivinnissaq pillugu paasissutissakitsoq

Nunarput namminersulivittuuppat qanoq isikkoqarnissaa pillugu paasissutissakinnera pissutaalluni inuusuttut apeqqummut angernissaannut nalornisitsisooratarsinnaavoq.

Tassa nunarput namminiilivippat qanoq ikkumaarnera pillugu paasissutissiiffigineqarsimanatik.

- Paasissutissanik pivallaarneq ajoratta. Immaqa KNR-ikkut tusagassiuutitigullu kisimi paasissutissanik pinerusariaratta, misigisimavunga naamik, Ane-Magdaline Petersen oqarpoq.

Namminersulernissamut tunngatillugu naammattumik paasissutissanik inuusuttut pisarnersut, KNR-ip misissuinerani aamma apeqqutinut ilaavoq.

Apeqqutinik akissuteqartut 74 procentiisa namminersulernissamut tunngatillugu paasissutissat pisartakkatik naammaginngikkaat erserpoq. 26 procentiisalu ilisimasatik naammagalugit.

Majoriami atuartut namminersulernissamut tunngatillugu ilisimasatik naammagineraat aperaagut.

- Naamik, Seri-Lisa Petrussen naatsumik akivoq.

Sofus Kristiansen assinganik aamma oqarpoq:

- Taakku oqallisaasut tusaallattaasarnikuuakka, namminersulernissaq eqqartornerugaat. Siunissamut tikkuussisutut ippoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.