Inuusuttut Inatsisartut ataatsimiittarfiat tigualerpaat

Inuusuttut nunatsinnit tamanersuut nunatta siunissami qanoq isikkoqarnissaa pillugu oqallinnissaminnut ulluni pingasuni periarfissinneqassapput. Inuusuttut 14-it 16-illu akornanni ukiullit inuusuttut inatsisartuinut peqataassapput. Inatsisartut ataatsimiittarfianni sapaatiuppat oqallittoqassaaq, inuusuttullu politikerit oqallinnerat KNR2-kkut malinnaavigineqarsinnaassalluni.

-Inuusuttut Inatsisartut innuttaasullu oqartussaaqatigiinnerat pillugu ullut pingasut ingerlaneranni sammisaqassapput qinikkallu aqqutigalugit innuttaasut oqartussaaqataanerisa ulluinnarni qanoq ingerlanneqartarnerinik misiliisinneqassallutik. Kingullermik februaarimi 2009-mi Inuusuttut Inatsisartuinik taallugu aaqqissuussisoqarpoq, ukioq mannali Inuusuttut Inatsisartoqartinneqarnissaat nutaarluinnarmik tunngaveqarluni ingerlanneqartussaalluni. Aaqqissuussinermi qitiutinneqarpoq inuusuttut Inatsisartoqarneq pillugu ilisimasassanik immersorneqarnissaat peqatigitillugulu nammineq isummersinnaanerminnik isummaminnillu illersuisinnaanerminnik ilinniartinneqarnissaat innuttaasut oqartussaaqataaneranni nalinginnaasumik malittarisassat isiginiarlugit, Inatsisartut siulittaasuat Josef Motzfeldt oqaluttuarpoq.

Inuusuttut Inatsisartuini ukiormanna sammineqartussaq qineqqusaarnermi oqallisaasupilussuuvoq: ”Oqaatsit - Oqaatsitigut piginnaasassavut eqqarsaatigalugit pingaartitavut anguniakkanut naapertuuppat?” Inuusuttut 35-it, taakkunannga illoqarfinnit nunaqarfinnillu illoqarfiit pingaarnersaata avataaneersut 29-it nunatsinni ataatsimiittarfiit ataqqinarnersaanni tamanna isummerfigissavaat.

Inuusuttut Inatsisartui suliaallu pillugit ingerlaqqiffissaq una atorlugu  paasisaqarnerusinnaavutit: inu.gl