Inuusuttut Inatsisartuisa inuusuttut akornanni suliffissaaleqineq sammissavaat
Inuusuttut Inatsisartui aappaagu februaarip aqqaneq aappaanniit 15-iat ilanngullugu ataatsimiissapput. Inuusuttut 18-it 24-llu akornanni ukiullit, naalakkersuinikkut sulinermik paasisaqarusuttut ataatsimeeqataaniarlutik qinnuteqarsinnaapput.
Peqataaniarluni qinnuteqarnissamut oktobarip 31-at 2014 killiliunneqarpoq.
Inatsisartunut qinersineq qanorluunniit inerneqaraluarpat, Inuusuttut inatsisartuisa 2015-imi ataatsimiinnissaanni qulequtaritinneqartoq soqutiginarpoq.
Inuusuttut akornanni suliffissaaqineq immikkut sammineqassaaq
“Inuusuttut akornanni suliffissaaleqineq” Inuusuttut Inatsisartuini ulluni sisamani ataatsimiinnermi sammineqassaaq: “Inuusuttut akornanni suliffissaaleqinermik ajornartorsiut annertusiartortoq qanoq iliuuseqarfigisinnaavarput?”. Tamanna sioqqullugu inuusuttut inatsisartuini peqataasut Inatsisartut inuinnaat naalakkersueqataanerat pillugu tunngaviusumik ilisimatinneqassapput, tamatuma kingorna inuusuttut akornanni suliffissaaleqineq oqallisigineqassalluni.
Isiginnaagassiamik takutitsisoqassaaq, nalorsitsaarisoqarluni, sammisamut immikkut ilisimasalinnit saqqummiussisoqassalluni Inatsisartullu ataatsimiittarfianni, siunnersuutinik suliarisimasanik saqqummiussiviusumik illersuiffiusumillu, ataatsimiittoqassalluni.
Inuusuttut Inatsisartui ataatsimiinnertik naammassigunikku naggataagut pisarnermissut inaarutaasumik nalunaarusiaminnik Inatsisartut Naalakkersuisullu Siulittaasuinut tunniussissapput.
Inuusuttut Inatsisartui inuusuttunik 36-nik ilaasortaqassaaq. Nittartakkami www.inu.gl-imi paasissutissanik amerlanerusunik pissarsisoqarsinnaavoq aamma nittartakkakkut attaveqatigiittarfimmi Facebookimi paasissutissanik pisoqarsinnaalluni.
