Inuusuttut Inatsisartuisa ataatsimiinnissaannut peqataanissamut soqutiginnilluarput
Inuusuttut Inatsisartuisa naapinnissaat ulluni pingasuni pissaaq, tassa februaarip ulluisa 22-anniit 24-annut - nunarpullu tamakkerlugu meeqqat atuarfianni atuartut 67-it peqataaniarlutik nalunaarsimapput.
Qinnuteqartut taama amerlatiginerat Inatsisartuiit siulittaasuata - Josef Motzfeldtip - naammagisimaaqaa.
- Atuartut taama amerlatigisut soqutiginninnerat takullugu assut nuannerpoq. Inuusuttut Inatsisartuisa ingerlariaasissaat nutaaq isumalluarnarpoq, inuusuttullu piumassusillit soqutiginnittullu takunissaat qilanaaraara, Josef Motzfeldt tusagassiuutinut allappoq.
Ukioq-manna qinnuteqartut pingajorarterutaat nukappiaraammata, Josef Motzfeldtip immikkut aamma nuannaarutigaa. Niviarsiaqqat peqataanissaminnut siornatigut kajumissuseqarnerusaraluarput.
Aaqqissuussinissamut atatillugu peqataasussat 35-t toqqarneqarnissaat maanna tullinnguuppoq. Peqataasussatut piukkunneqartut e-mailikkut SMS-ikkulluunniit oktobarip ulluisa 30-anni nalunaarfigineqarumaarput.
Inuusuttut Inatsisartuini pisussanut pilersaarut nittartakkami inu.gl-imi atuarneqarsinnaapput, pilersaarullu Inatsisartut Allattoqarfiata aaqqissuutileruttorpaa.
Inuusuttut Inatsisartuini qulequtarineqassaaq "Oqaatsit" - taassuma iluaniissalluni "Oqaatsitigut piginnaasassavut naleqquttumik aalluppavut?"
