Inuusuttut Inatsisartui ullumi aallartipput

Inuusuttut 24-t illoqarfinnit assigiinngitsunnersut ulluni makkunani Nuummiipput politikeritut sulineq misilissallugu.
februaarip 20-at 2017 16:40

Inuusuttut 18-it 24-llu akornanni ukiullit Inuusuttut Inatsisartuini ataatsimeeqataassapput, naapinnermilu tamat oqartussaaqataanerat ilinniassavaat oqartussaaqataanermillu ingerlaatsimik misiliissallutik.

Inuusuttut Inatsisartui tallimanngorpat ilanngullugu ataatsimiissapput, ukioq mannalu qulequtarissavaat "Kalaallit tunngaviusumik inatsisaat. Nammineq tunngaviusumik inatsiseqalernissatsinnut piffissanngorpa?" Qulequtarineqartullu eqqartorneqarnissaa peqataasussat ilaannit pissanngatigineqarpoq.

- Takorloosinnaanngikkallarpara, kisianni eqqartornissaanut ilamalu oqaasissaat pissanganartorujussuupput. Taavalu isummernissat pissanganartut ilagivaat, Kasper Tittusen Qaqortumeersoq taama oqarpoq.