Inatsisartunut siunnersuut: Inuusuttut ilinniagaqanngitsut attavigilluarneqarnerulissapput
Inuusuttut 16-it 25-illu akornanni ukiullit 30 procentiisa missaat ilinniakkamik aallussinatillu suliffeqanngitsut Nunatta naatsorsueqqisaartarfiani takussutissaavoq. Inatsisartunut siunnersuut malillugu inuusuttut ilinniagaqalersinniarnerat pitsanngorsaaviginiarneqarpoq.
Siunnersuut malillugu meeqqat atuarfiata kiisalu suliffisaqartitsiniarnermut ilinniagaqarnissamullu siunnersuisarfiup Majoriap suliaasa erseqqissarnissat pineqarpoq. Siunnersuut Inatsisartut ukiaanerani ataatsimiinneranni tallimanngornermi septemberip 19-at aallartittussami oqaluuserineqassaaq.
Inuusuttut 16-it 25-illu akornannik ukiullit 29 procentii ilinniartuupput. Tassani aamma ilaapput efterskolertut inuusuttullu ilinniagaqartut amerlanersaat GUX-mi ilinniartuupput.
Taakkuli amerlaqqatipajaavi eqqaaneqareersutut ilinniagaqaratillu suliffeqanngillat.
Ilinniartitaanermut, kultureqarnermut, ilagiinnut timersornermullu Naalakkersuisoq Nivi Olsen Inatsisartut ukiaanerani ataatsimiinnissaanni saqqummiussissaaq inuusuttut ilinniagaqalersinniarlugit suliffeqalersinniarlugillu ujartuilluni siunnersuisarnerup erseqqissaammik.
Aqqusinermi ujartuineq
Siunnersuut naapertorlugu inuusuttut 18-it ataallugit ukiullit ujartornerat meeqqat atuarfiata isumagissavaa inuusuttullu 18-leereersut ujartornerat Majoriamit isumagineqassasoq.
Ujartuinermi inuusuttut sumiiffiannut naaperiarneqartassapput.
- Tamanna pisinnaavoq ilinniarfinni, suliffinni, angerlarsimaffinni imaluunniit kikkut tamarmik ornittagaanni, tassunga ilanngullugit aqqusinermi. Ujartuilluni siunnersuinermi aamma avinngarussimasut killilimmik ilinniarfissanik suliffissanillu neqerooruteqarsinnaasut ukkatarineqarsinnaapput, Nivi Olsen siunnersuutip nassuiaatitaani allappoq.
Siunissami meeqqat atuarfiata suliarisassavaa inuusuttut 18-it ataallugit ukiullit ilinniagaqarnerup suliffeqarnerullu avataanut inississimasut ilinniagaqarnissaannut pilersaarusiortarneq. Tamanna ullumikkut Majoriami suliarineqartarpoq.
Meeqqat atuarfiata aamma inuusuttut 18-it ataallugit ukiullit ikinnerpaamik ukiumut ataasiarluni ataatsimeeqatigisassavai tassanilu angajoqqaatut akisussaasut ilanngullugit aggersarneqartassapput.
Nivi Olsenip siunnersuuteqarnermini erseqqissaatigaa kommunet nutaanik suliassinneqanngitsut uanili pineqartoq suliat kommunet ingerlateriigaanni akisussaaffiit nutaamik agguataarnerat.
Siunnersuut Inatsisartut siullermeerlugu septemberip 24-at oqaluuserissavaat.
