Inuusuttut atuakkiortussamaatit nunani avannarlerni isumasioqatigiilersut

Inuusuttut atuakkiortunngornissamut piukkunnaateqartut nunani avannerlerneersut 26-t taakkunannga Kalaallit Nunaanneersut arfineq pingasut - nunani avannarlerni atukkiortutut siunissami takorluugaat pillugit Reykjavikimi sapaatip-akunnerani uani katersuutissapput.

Inuusuttut peqataasussat allat Ålandimit, Islandimit Savalimmiuniillu aggersuussapput.

Isumasioqatigiilluni naapinneq taaguuteqartinneqarpoq "Norden 2040" - nunat avannaarliit ukiumi 2040-mi. Tassani inuusuttut nunani avannarlerni ukiumi 2040-mi takorluukkatik atuaganngorlugu allaaserissavaat allaaserisaallu  nittartakkamut taaguuteqartumut " Medium"-imut saqqummersissavaat.

AAMMA ATUARUK VIDEO Atuakkiortussamaatit nappaatit, pissaanillit, asanninneq sorsunnerillu allaaseraat

Taamaasilluni politikerit, aqutsisut inuiaqatigiinnilu malinnaasut periarfissinneqassapput qanoq inuusuttut nunani avannarlerni avinngarusimanerusuneersut siunissamut qanoq takorluugaqarnersut atuassallugu, NAPA,
Nunani Avannarlerni Piorsarsimassutsikkut Attaveqaat tusagassiorfinnut nalunaaruteqarluni taama allappoq.

Oqaluttualiornermik unammisitsinermut Allatta 2040-mut ajugaasuni qulini arfineq-pingasut Islandimut ilaassapput.

Taakkua atuakkiortut nunarsuarmi tamarmeersut naapeqatigiiffiannut International Litteratur Festivalimut peqataassapput, assersuutigalugu atuakkianik allatanillu atuaanerni.

- Pissanganarpoq nunani assigiinngitsuni sisamaninngaanneersut naapissallugit. Pissanganarporlu inuusuttoqatitta nunat avannarlerni siunissatsinnut takorluugaat tusaassallugit paasisaqarfigissallugillu, Maasi Brøns Chemnitz kalaallit inuusuttut peqataasussat ilaat taama oqarpoq.

Tassuma neriuutigaa Reykjavikimi atuakkiortut katersuunneranni Kalaallit Nunaanni atuakkiornerup siuarsarneranut iluaqutaajumaartoq.

AAMMA ATUARUK "Allatta!"-mi ajugaasut atuakkiaat arfininngorpat saqqummissaaq

Nunani avannarlerni atuakkiortut Reykjavikimmi naapeqatigiinnerat ullunik sisamanik sivisussuseqassaaq tamanna sisamanngorpat septembarip ulluisa qulingani aallartissalluni.