"Allatta!"-mi ajugaasut atuakkiaat arfininngorpat saqqummissaaq
Oqaluttualiornermik unammisitsinermi ukioq 2040 ukiormanna qulequtarineqarpoq - inuusuttullu qulit oqaluttualiorput - ilaatigut oqaatsit nikallornartut atorlugit - siunissaq qanikkaluartoq sammineqarput aatsitassarsiorneq, pissaanillit, asanninneq, pisuut aamma piitsut, nappaatit sorsunnerillu.
Oqaluttualianik atuartussat oqaluttualiat qilanaarisinnaagaat, atuakkanik saqqummersitsisarfik Milik Publishing atuakkamik suliarinnittuusoq nalunaarpoq. Kalaallit pingaartitatoqaat nunarsuarmioqataanerulernitsinni annaaneqarsinnaammata arlallit ernummatigaat. Politikerillu ineriartorneq tamatsinnut inooqataaffigineqarsinnaanngorlugu aqussinnaaneraat, apeqqutigineqartut ilagaat.
AAMMA ATUARUK Allattami ukiormanna ajugaasut toqqarneqarput
"Allatta 2040"-p saqqummersinneqarneranut atatillugu illoqarfinni pingasuni arfininngorpat ataatsikkut malunnartitsiniartoqassaaq, tassa Nuummi, Sisimiuni Ilulissanilu - nalunaaqutaq ataatsimiit pingasut tungaannut aaqqissuussisoqassagami.
Ilanngullugu oqaatigisinnaavarput Allattami unammisitsineq aqqutigalugu atuakkiortoq Niviaq Korneliussen saqqummersitseqqaamat, atuakkiaalu Homo Sapienne, Nunat Avannarliit atuakkiortunut nersornaasiuttagaanut 2015-imi innersuunneqarluni.
