Allattami ukiormanna ajugaasut toqqarneqarput
Niviaq Korneliussenip atuakkiortutut soqutigineqarnera oqaluttualiornermik unammisitsinermi Allattami siorna ajugaanerata kingorna aallartippoq. Ukiormanna Allattamik unammisitsinerup kingorna atuakkiortussatut piukkunnartut nutaat qulit nassaarineqareerput.
Oqaluttualiornermik unammisitsinermi nutaami ukiormanna pisumi oqaluttualiat nutaat 32-t nassiunneqarput, taakkulu inuusuttunit 15-init 25-nut ukiulinnit allagaallutik.
Maannalu unammisitsinermik aaqqissuisuusut tassaasut NAPA, tassa Nunat Avannarliit Piorsarsimassutsikkut Attaveqaataat, Milik Publishing aamma Sorlak, oqaluttualiornermi ukiormanna unammisitsinermi pitsaanerpaat qulit toqqareersimalerpaat.
AAMMA ATUARUK Inuusuttut atuakkiortut pisariaqartinneqarput
Unammisitsinermi Allatta 2040-mik taaguutilimmi ajugaasut qulit tulleriiaaqqissaarnagit ukuupput: Karoline Lennert Sørensen, Bibi Lund, Kenny Fisker, Ilannguaq Karlsen, Maasi Chemnitz, Ludvikka Tellesen, Nukappi Boassen Wille, Debora Hansen Kleist, Marco Lund Olsen aamma Sandra Mathiasen.
Ajugaasut taakku qulit januaarip naalernerani Nuummi allannermik sungiusartinneqassapput, tassanilu Jessie Kleemann, Mette Moestrup aamma atuakkamik saqqummersitseqqammersoq Niviaq Korneliussen peqatigalugit atuakkamut saqqummersinneqartussamut - Allatta 2040-mut - oqaluttualiatik inaarsassavaat.
Ajugaasut taakku tamarmik immikkut 2500 koruuninik akissarsitinneqarput, inuusuttullu Nunani Avannarlerneersuut inuusuttut allattarnerat pillugu isumasioqatigiinnissami 2015-imi Reykjavikimi pisussami 'Norden 2040'-mi peqataasussanngorlutik.