Inuusuttut atuakkiortut pisariaqartinneqarput
Unammisitsineq aaqqissorneqarpoq, Nunani Avannarlerni Piorsarsimassutsikkut Attaveqaat Napa, Nunatta Atuagaateqarfia, inuusuttut suliniaqatigiiffiat Sorlak, aningaasaateqarfik Nunafonden aamma atuakkanik saqqummersitsisarfik Milik Publishing suleqatigiillutik.
Nunatsinni inuusuttunik atuakkiortunik pisariaqartitsisoqarpoq, NAPAmi sulianik aqutsisoq Katja Vahl oqarpoq.
- Kalaallit Nunaanni atuakkianik saqqummersitanik peqarluarpoq taakkua nuna allamiut atuakkiaat nutserneqarsimasut amerlapput, tamannalu ajunngilluinnarpoq, kisianni nunatsinni inuusuttut inuusuttoqatimik allaataannik namminneq kulturerisaminnit allatat pisariaqartinneqarput taakkua tarrarsorfigisinnaagamikkit, Katja Vahl oqarpoq.
Taassuma nassuiaatigaa oqaluttualianik allatat kinaassutsimut misigissuseqarnermut tunngassuteqarmata.
- Oqaluttualianik allalluni unammisitsinermi Allattami siullermi tamanna paasivarput, oqaluttualiat amerlasuut inuusuttut namminneq pillutik ulluinnarnilu atukkatik pillugit allaaserisaqarmata, Katja Vahl oqarpoq.
Inuusuttut oqaluttualiaannik unammisitsineq Allatta siullermeerluni 2012-mi ingerlanneqarpoq.
Taamani peqataasut amerlapput soqutigineqarluarporlu.
Inuusuttut 15-nit 25-nut ukioqartut 37-it peqataapput. Oqaluttualiat allanneqartut atuaganngorlugu saqqummersinneqarpoq tamannalu ilinniarfinni assigiinngitsuni soqutigineqarluni atorluarneqartoq, atuakkanik saqqummersitsisarfimmit Milik Publishingmit oqaatigineqarpoq.
