VIDEO Atuakkiortussamaatit nappaatit, pissaanillit, asanninneq sorsunnerillu allaaseraat
- Takusareerlugu qarasaasiakkut atuaannarlugu nuannissaaq pappiliakkut takullugu, Kenny J. Fisker, oqaluttualiornermik unammisitsinermi peqataasoq KNR-imut oqarpoq.
Taassuma atuakkiaa ateqarpoq "Piffissaanngitsumi", nappaatimillu eqqugaaneq eqqartorneqarluni.
- Paniniluunniit kiisa ilisarisinnaajunnaalerpaa. Sanigorujussuarsimavoq, qaninngualu qernertuinnanngorsimalluni. Suugaluarnersup iluaninngaanniit nungukkiartuaarpaa, Kenny J. Fisker atuakkiaminit atuaanermini taama atuaavoq.
Nukappi Boassen Willep oqaluttualiaa ateqarpoq "Qilaat – Kalaallip Anersaava".
- Aatama toornai akornatsinni qittatileqaat inuinnarnut oqaluttaleqaat timaamiuusugut nuannaarneqartaleqaatigut kalaaliusugut nungukkiartornerarpaatigut illoqarfissuarmiut kalaaliujunnaalerput susinnaajunnaalerput, oqaluttualiami tamanna ilaatigut atuarneqarsinnaavoq.
Siunissaq taartorujussuartut takorloorneqarpoq
Atuakkiortoq Niviaq Korneliussen "Allatta" aqqutigalugu saqqummersitseqqaarpoq, "Allatta"-mi 2012-imi peqataavoq, inuusuttullu oqaluttualiaat qulit atuareerlugit maluginiagaqarpoq:
- Oqaluttualiaaqqat tamangajaavimmik politikkimut tunngapput, taavalu amerlanerpaat taartorujussuullutik siunissamut takorluuinerit taartorujussuit, "Homo sapienne-"imik atuakkiortoq oqarpoq, Nukappi Boassen Willelu isumaqataavoq:
- Kalaallit Nunaata massakkut inissisimanera isumassarsiorfigivara, taavalu eqqarsaatigalugu susoqarsinnaanersoq uagut massakkut inooriaaseqarnerput, Nukappi Boassen Wille oqarpoq.
Kenny J. Fiskerip isumassarsiorfigisaa allaanerulaarpoq:
- Spillertorujussuuvunga tassani allakkakku spillerpata qanoq avaanngunartorujuk inuit toqorarsimasut, inuit uumaniarsarisut taava eqqarsaramaana tassunga allaassinnaanerlunga taava ikkuppara oqaluttuamut, Kenny J. Fisker oqarpoq.
Oqaluttualiat qulit atuakkiami "2040" saqqummersinneqartut pisiniarfinniilereerpoq.