Inuusuttut amerlanerit qineqqusaarnissaat Julianep kissaatigaa
- Maanna ukiuni arfineq-marlunni politikkikkut sulereerlunga, arnat angutillu inuusuttut meerartallit, inuiaqatigiinni pissutsinut allanngueqataarusullutik suleqataarusukkaluarlutik sassarumasanngitsut, naapittarpakka. Sassarumasanngillat, politikkikkut sulinermi atugassarititaasut ilaqutariittut inuunermut tulluanngimmata. Tamanna aporfiujunnaartariaqarpoq, politikkikkullu sulinermi ilaqutariittut inuusinnaaneq inissaqartariaqarpoq - allannguinikkut, tusagassiuutinut nalunaarummini, Juliane Henningsen allappoq, nangillunilu ima tunngavilersuilluni.
- Inatsisartuni ataatsimiinnerit ima sivisutigisarput, allaat ilaquttat ullorpassuarni takuneq ajornartarlutik, tamanna peqqinnanngilaq. Taamaattumik ataatsimiittarnerit ilaqutariinnermut naleqqussarneqarnissaat, Inatsisartut ataatsimiinneranni tullermi oqallisigineqarnissaa siunnersuutigissavara, Juliane Henningsen allappoq.
- Politikkikkut sulinerup aaqqissuussaanera allanngortariaqarpoq, pissusitoqqat attanniaannarlugit attanneqarsinnaanngillat, inuiaqatigiinni ilusilersueqataarusunneq periarfissinneqarniarli. Taamaattumik inuusuttut, meeraqaraluarlutik sassarnissaat kaammattuutigerusuppara. Tamanna Inatsisartut ataatsimiittarnerisa siaarneqarnerisigut pisinnaalluarpoq, imaluunniit katersuuttarnerit amerlineqarnerisigut, marluinnaatinnagit, tusagassiutinut nalunaarummini Juliane Henningsen allappoq.
