Inuusuttunut nangeqattaartuliamik Nuummi immiussilersut

Aka Hansenip Super16-imi ilinniartoqatini sisamat peqatigalugit nangeqattaartuliaq "Polar"-imik taaguuteqarallartoq suliarissavaa. Nuummiu angut inuusuttoq anguteqatiminoortoq ajugaqanngitsoq nangeqattaartuliami malittarineqassaaq. Aka Hansen tusagassiorfinnut nalunaaruteqarluni taama allappoq.

- Angutip inuusuttup, Ivimmik atillip, angummut danskimut peqatigisaminut Nuummut nooqqammersumut asannilersoornera pineqarpoq. Ivik ajugaqanngitsuuvoq, asasanninnilu aqqutigalugu nukiit pigisami aqunnissai ilikkarpaa namminerlu qanoq-ittuunini akueralugu, Aka Hansen, nangeqattaartuliassami produceriusut aappaat taama oqaluttuarpoq.

AAMMA ATUARUK Aka Hansen Danmarkimi filmiliornermik ilinniarfimmi ilinnialernissamut akuerisaasoq

Nangeqattaartuliamik suliarinnittussat Super16-imi ilinniarnermik qiteqqunnerani suliniutigissavaat, immiussinerillu aappaagu apriilimi aallartinnissaat naatsorsuutigaat. Nangeqattaartuliassamulli internettikkut aallakaatinneqartussamut aningaasaliisussarsiortoqaqqaassaaq.

- Suliniutissarput isumalluarfigeqaarput. Nittartakkatigut nangeqattaartuliamik Danmarkimi isiginnaartartunit aammalu soorunami Kalaallit Nunaanni isiginnaartartunit nuannarineqartumik suliaqarnissarput anguniagaraarput, Aka Hansen oqaluttuarpoq.

Sulisussarsiorlutillu pingaarnertut inuttaasussarsiorniartut

Aka Hansen naapertorlugu immiussinerit Nuummi suliffinnik arlalinnik pilersitsissapput.

- Nangeqattaartuliornermi suleqataasussat Danmarkimeersut arfineq-pingasut tikissapput, Nuummilu immiussisoqalerpat inuit 8-10 missaat sulisorineqassapput. Ilaatigut pingaarnertut inuttaasumut Ivimmut angummik inuusuttumik pisariaqartitsissaagut, tamatumalu saniatigut aamma allatigut suliaqartussat, soorlu qullilerisoq, pinnersaasartoq, atisassanik piareersaasoq allallu pisariaqartissavagut.

AAMMA ATUARUK Small Time Giants pillugit piviusulersaarut Danmarkimi takuteqqaarneqassaaq

Aka Hansenip saniatigut Super16-imeersut allat tassaapput oqaluttualiortoq Morten Mortensen, ilitsersuisartut Natalia Ciepiel aamma Alexander Ohrt, producerilu Maria Møller Christoffersen.

POLAR Nunatsinni Danmarkimilu 2017-imi oktobarip qaammataani takuteqqaarneqassaaq.