Aka Hansen Danmarkimi filmiliornermik ilinniarfimmi ilinnialernissamut akuerisaasoq
Ukioq ataaseq allortarlugu Filmiliornermik ilinniarfiup Super16-nip ilinniartut 16-nit ilinnialersittarpai. Ilitsersuisutulli ilinniarnermi Aka Hansenip ilinniarfissaani arfiniliinnaat ilinnialertarput.
- Aallartinnissannut qilanaaqaanga, nunatsinnut danmarkimullu tunngassuteqartunik suliaqarnissara pilersaaruteqarpunga, Aka Hansen oqaluttuarpoq.
Aka Hansen nunatsinni filmiliortartut akorngini ilisimaneqarlualereerpoq. Nunatsinnilu filmiliortartut nersornaasiuttagaannit annersaannik Innersuarmik nersornaasigaavoq, aammalu ersinartuliamut 'Qaqqat alanngui'-nut juullimullu ammartakkamut 'Nissit angakkuaatillu'mut ilitsersuisuunikuulluni.
Ilinniarnissani septembarip aallaqqaataani ukioq manna aallartissavaa. Ilinniarneq ukiuni pingasunik ingerlanneqartarpoq, ilinniartullu ukiumut ataasiarlutik filmiliamut ilitsersuillutik ingerlatsisarput.