Small Time Giants pillugit piviusulersaarut Danmarkimi takuteqqaarneqassaaq

Piviusulersaarut taaguuteqartoq 'STG', nipilersoqatigiit taagutaannik naalisagaavoq Aka Hansenimillu, ilaatigut Qaqqat Alannguinik suliarinnittutut ilisarisimaneqartumit, ilitsersuiffigineqarlunilu suliaalluni.

'STG'-ip takutinneqarnera aamma Aka Hansenip filmiliornermik ilinniarfimmi Super16-imi ilinniarnermi ukiuani siullermi suliaminik takutitseqqaarnerissavaa.

- Qilanaartupilussuuvunga. Piviusulersaarutip nipilersoqatigiit aammalu soorunami Nunatta soqutigineqarnerulernerinik kinguneqarnissaa neriuutigaara, Aka Hansen tusagassiorfinnut nalunaaruteqarluni taama allappoq.

Nipilersoqatigiit Miki Jensen, Pilutannguaq Løvstrøm Hammeken, Jakob Søvndahl aamma Jonas Nilsson piviusulersaarummi minutsinik 22-nik sivisussuseqartumi malittarineqarput, nipilersoqatigiillu Nunatta avataani nipilersornikkut iluatsitsinissamik takorluugaqarnerat oqaluttuarineqarluni.

Piviusulersaarutip Nunatsinni takutinneqarnissaa pilersaaruteqarfigineqanngikkallarpoq, Nunatsinnili innuttaasut piviusulersaarummik isiginnaarnissaannut periarfissaqalernissaat Aka Hansenip neriuutiginerarpaa.

Piviusulersaarut 2013-imiilli suliarineqalerpoq NAPA-miillu Namminersorlutillu Oqartussat kulturimut aningaasaliissutaannit tapiiffigineqarsimalluni.