Politiit ullormut nalunaarutaat: Inuusuit sisamat aallarussanik biilertillutik politiinit qimaasutut unnerluutigineqarput
Kalaallit Nunaanni Politiit sapaatit akunnerata naanerani suliassaaleqinngeqaat.
18-inimmi ukiullip Tunumi Tiilerilaami aallaasersornerani eqqortittut ilaat 33-nik ukiullip toqunerata saniatigut Nuummi Qaqortumilu allanik aamma pisoqartoq, Kalaallit Nunaanni politiit ataasinngornermut pigaartuisa pisortaat Jeppe Andsager oqarpoq.
- Pisup aappaani inuusuit sisamat 18-liisimanngitsut aallarussanik biilertillutik politiinit malersorneqartillutik qimaariaraluartut tigusarineqarput, taakkualu tassa biilinik aallarussisimasutut aallarusseqataasimasutullu unnerluutigineqarput, Jeppe Andsager oqarpoq.
Aallarussanik biilertut qimaariaraluartut aamma tillinniartoqartoq
Inuusuit sisamat biilinik aallarussank Nuummi mittarfiup pinerluuteqarsimasunullu inissiisarfiup akornanni aqqusinikkoortillutik politiinit qimaapput. Biilinik aallarussanik ingerlatsisoq 16-inik ukiuliusoq paasinarsivoq, taannalu biilinik ingerlatsisinnaanermut allagartaqarnani biilinik ingerlatsisimasutut, navianartorsiortitsisimasutut politiillu peqqusinerannik malinnissimanngitsutut unnerluutigineqarpoq.
- Politiit suliami tassani misissuileruttormata allamik oqaaseqangaarsinnaanngilanga, inuusuilli sisamat taakkua biilinik aallarussisimasutut aallarusseqataasimasutullu unnerluutigineqartussaassasut, politiit pigaartuisa pisortaat oqarpoq.
Tamatuma saniatigut politiit allanik marlunnik tillinniarnermut tunngasuusunik aamma suliaqarput. Suliap aappaa Qaqortumi inuusuit ornittagaata sapaammut unnuaani tillinniarfigineqarneranut tunngasuuvoq, aappaalu Nuummi Hotel Nordbop ataasinngornermut unnuaani aamma tillinniarfigineqarneranut tunngasuulluni. Pisuni taakkunani tillinniartut kiunersut politiit ilisimanngilaat, taammaammt sulianut taakkununnga tunngatillugu ilisimannittoqarpat attavigeqqupput.
Kalaallit Nunaanni Politiit 70 14 48-imut sianerfigalugit attavigineqarsinnaapput.
