Inuussutissarsiortunut ikiorsiissuteqarnissaq ullumikkut isumaqatigiinniutigineqartoq
![](/sites/default/files/styles/image_934x467/public/article_images/penge_simon.jpg?itok=aKFOOPP-)
Nunatsinni coronavirusip siaruatsaaliorniarsarinera pillugu killilersuinerit amerliartuinnarput. Pingasunngornermi killilersuilernerit Nuummi suliffeqarfinnut pingaartumik eqquivoq, killilersuilernermi oqartussat imerniartarfiit, neriniartarfiit pisiniarfiillu matunissaat peqqussutigaat.
Oqartussaniilli siusinnerusumi killilersuinerit nunatsinni suliffeqarfinnut eqquipput, taamaammat Naalakkersuisut, Sulisitsisut sulisartuniillu sinniisut nalunaaqutaq aqqanermut ataatsimiipput, tassanilu illuatungeriit inuussutissarsiortunut ilungersuasunut ikiorsiissuteqarnissaq oqallisigissavaat.
AAMMA ATUARUK Coronavirus: Arctic Circle Business millionerpassuarnik annaasaqarpoq
Ikiorsiineq qanoq imaqassanersoq suli ilisimaneqanngilaq, Naalakkersuisulli aningaasaqarnermut akileraartarnermullu ataatsimiititaliamut siunnersuummik nassiussaqarput, taakkulu siunnersuutip imarisaa maannakkut suliaraat.
Takornariaqarneq kiffartuussinerillu eqqugaanerusut
Takornarialerinermik kiffartuussinermillu suliaqartut corona pillugu ajalusoornermit eqqugaanerpaapput.
Illuatungeriit ikiorsiissuteqarnissaq pillugu ataatsimiitttut COVID-19 inuussutissarsiornermut suliffeqarnermullu ataatsimiititaliamik immikkut ittumik pilersitsipput, taanna naalakkersuisoqarfinnit suliffeqarnermiillu pisariaqartunit inuttalerneqarpoq.
Ataatsimiititaliap suliffeqarneq inuussutissarsiuteqarnerlu pillugit pissutsit malinnaaffigissavai, tassanilu pisariaqartunik suliniuteqarnissamut ingerlaavartumik siunnersuuteqartarnissaq siunertaalluni.
AAMMA ATUARUK Coronavirus peqqutaalluni akunnittarfinnik unnuisartut ikilingaatsiartut
Danmarkimi naalakkersuisut danskinut inuussutissarsiornermik ingerlataqartunut ikiuiniarlutik utaqqiisaarutaasunik assigiinngitsunik suliniuteqarnissat siunnersuutigaat. Danskit naalakkersuisuisa Danmarkimi namminersortut suliffeqarfiillu ilungersuanerusut 40 milliardit koruuninik ikiorsiivigineqarnissaat siunnersuutigaat.
Aaqqissuussineq akunnittarfinnut, neriniartarfinnut, assartuisartunut timmisartuutileqatigiiffinnullu piffissami matumani eqqugaanerpaasunut ilaatigut atuutissaaq