Coronavirus: Arctic Circle Business millionerpassuarnik annaasaqarpoq
11 millionit koruunit. Arctic Circle Businessip aningaasat taama amerlatigisut aannaareerpai.
- Eqqugaavugut, Louise Lynge Berthelsen, Arctic Circle Businessimi pisortaq oqarpoq.
Takornariat coronavirus pissutaalluni taamaatitsisut amerlammata Arctic Circle Businness annaasaqarpoq.
Nunatsinni maannamut inuit marluk coronavirusimik tunillatsissimasut paasineqarpoq.
AAMMA ATUARUK Nunatsinni coronavirusimik tunillatsissimasoq alla paasineqartoq: Nuuk matuvoq
Maniitsup eqqaanut sisorariat ukiup imaalinerani ikigisassaaneq ajorput. Massakkulli sisorariartuerussimavoq.
- Coronavirusertoqaannassappat takornarialerinerup iluani 70 millionit koruunit sinnerlugit annaasaqaatigineqarsinnaapput. Tassanilu ilaatigut Maniitsup eqqaani heliskiingimik taallugu angallassisartut eqqugaanerpaanut ilaallutik, Louise Lynge Berthelsen oqarpoq.
Angerlatiinnarneqartut
Takornariaqanngimmallu Qeqqata Kommuniani takornarilerinermi suliaqartut amerlasuut angerlartiinnartariaqarsimapput.
- Maannamut 55-it suliunnaarsinneqareersimapput, imaluuniit akissarsiaqartinneqaratik angerlartiinnarneqarput. Coronavirusertoqaannassappat taakkua marloriaatinngoriaannaapput tassa 110-nik amerlassuseqalerlutik.
Suliffeqarfiit arlaqartut akiliisinnaajunnaarnissartik annilaangassutigilereermassuk Naalakkersuisut aningaasatigut ikiorsiissuteqarnissaat, Arctic Circle Business-imit noqqaassutigineqarpoq.
Suliffeqarfiit akileraangikkallarsinnanerat Arctic Circle Businessimit aqqutissaasorineqarpoq.
- Naalakkersuisut ikiorsiissuteqarnissaannik kaammattorusuppagut, soorlu qaammatini pingasuni ukiullunniit affaani suliffeqarfiit akileraangikkallarnissaannik, tassa Kalaallit Nunaata corinavirusimit eqqugaaqqanerata nalaani.
Ikiorserneqarnissaat sulissutigineqartoq
Taama inissisimaneq Qeqqata Kommuniani namminersortunut ernumalersitsivoq.
-Inuit toqqissisimanngillat, ernumapput siunissamilu qanoq pinissartik annilaangassutigaat. Arlaannik ikiorsiisoqanngippat suliffeqarfiit ilaasa akiliisinnaajunnaarnissartik ernumassutigaat.
AAMMA ATUARUK Coronavirus peqqutaalluni akunnittarfinnik unnuisartut ikilingaatsiartut
Suliffeqarfiit aningaasatigut ajornartoorluinnalersimasut arlaatigut ikiorserneqarsinnaanissaat Naakkersuisut Sulisitsisullu oqaluuseralugu aallartissimagaat, Sulisitsisunit Erik Holmsgård ilisimatitsivoq. Qanorpiarli aaqqiissuteqartoqassanersoq sui oqaluuserineqarsimanngilaq.
Coronavirusip kingunerisaanik suliffeqarfiit aningaasatigut annaasaqarsimasut qanoq ikiorserneqarsinnaanersut Naalakkersuisut Sulisitsisut peqatigalugit sapaatip akunnera una naalerpat aaliangiiffigisinnaasagaat Sulisitsisuniit ilimagineqarpoq.