Inuussutissanik pilersuinermik nunarsuarmi nakkutilliisoq Gazami kaannersuaqaratarsinnaaneranik aarlerisaaruteqartoq

Gazami kaannersuaqaleratarsinnaavoq, inoqutigiimmi 30 procentiisa missaat kaannersuaqarnermik eqqorneqariaannaasut, IPC, inuussutissanik pilersuinermik nunani tamalaani nakkutilliinermik sulialik taama oqarpoq.

Kaannersuaqaratarsinnaaneranik naliliineq immikkoortunut tallimanut immikkoortinneqartarpoq, 5 aarlerinarnerpaatut nalilerneqartarluni. Inoqutigiit inuussutissanik tunngaviusunik amigaateqartut matumani pineqartarput, Gazalu naliliinermi immikkoortumut 5-imut inissinneqarpoq.

- Kaanneq, toqusut peqqinnanngitsunillu nerisaqartoqarneranut takussutissaqarpoq. Ilungersunarluinnartumik inissisimasoqarpat immikkoortumut tassunga inissiisoqartarpoq, IPC oqarpoq.

Gazap avannarpasissuani innuttaasut 70 procentii immikkoortumi 5-imi inissisimapput.

IPC-p kaannersuaqaratarsinnaaneranut aarlerisaaruteqarnermi immikkoortunut tallimanut immikkoortitsisarnera Naalagaaffiit Peqatigiinnit atorneqartarpoq, inuussutissanik pilersuinerup isumannaassusaa nalilerneqartarluni.

Taamatut naliliilluni immikkoortitsisarneq Somaliami 2004-mi atuutilersinneqarpoq.

Kisitsisit IPC-p tunngavigisai ukioq manna marsip qaammataa ilanngullugu naliliinermeersuupput.

Gazami innuttaasut amerlanerusut IPC-p immikkoortitsisarnerani immikkoortumut 5-imut qaammatit pingasut tulliuttut ingerlaneranni inissinneqaratarsinnaanerat aarleqqutigineqarpoq.