Piviusulersaarusiami pingaarnertut inuttaq: Inuuninni angusama annersaasa ilaat
Piviusulersaarusiaq "Life on the Edge," Aqissiaq Nuka Semsen pingaarnertut inuttaaffigisaa siullermeerluni 14. juni nunarsuarmi piusulersaarutit festivali annerpaat ilaat Sheffield DocFest-mi takuteqqaarneqarpoq.
Piviusulersaasiaq Aqissiap imminut toquttarneq pinaveersaartinniarlugu suliaanut, nammineq misiginikuusaanut, inuunerminilu anguniagaanut tunngavoq.
Piviusulersaarusiami Aqissiaq Nuka Semsen inuunermini sakkortuunik aqqusaagaqarsimanera inuunerminut sunniuteqarnikut oqaluttuarivai. 2020-mi illooqqani imminut toqussimasoq nassaarivaa, siornatigullu kammaginerpaasani aamma imminut toqunnikkut annaanikuuaa.
Misigisat sakkortuut inuunermut tunniutiinnaqqalluni, suna tamaat tunullugu, imminut toquttarneq pinaveersaartinniarlugu suliani allaat.
- Taamani suna tamaat tunniutiinnaqqaffigigakku, suna tamaat tunullugu, suliakka, suliffiga, ilaquttakka, inuunera allaat, nallangaannaleqqaasallunga. Aqissiaq oqarpoq.
Sakkortuunik aqqusaagaqaraluarluni inunnik ikiuerususussusaata nunatsinni angalavoq nammineq oqaluttuani oqaluttuarisarlugu.
Qeqertarsuarmi angerlarsimalluni, National geografic-miit filmiliortut inuusuttumik piviusulersaarisiami inuttassaminik ujarlersimapput, Aqissiaq naapikkakkamikku aaliangersimapput piviusulersaarusiorniarlutik. 2020-mi Augustimi inuunera suliaalu pillugit immiussillutik aallartipput.
Young Jury Award
Piviusulersaarusiaat “Life on the edge” Festival-mi “Youth Jury award”-mut innersuunneqarput, tassaasoq inuusuttut naliliisartut isumaat piviusulersaarutit silarsuaanut appakaatilertut, piviusulersaarut torrallataanerpaaq inuusuttut isaaniit toqqarneqartarluni.
Innersuunneqartuni toqqagaanngilaq kisianni nersornaaserneqartut avammut nalunaaritigineqarneranni immikkut maluginiagassatut eqqaaneqarput. Naliliisartut immikkut maluginiagassatut oqaaseqaatimini imatut oqarput:
- Piviusulersaarusiamik suliarinnittut inuttaalu, sorsuuteqarlutik, nunap inoqqaavi imminut toquttarneq pillugu oqaluttuaat, tarnikkullu nanertuutit pillugit isumat nikanarsaatit akiorniarlugit suliniuteqarnerat nersualaarusuppagut. Naliliisartut oqarput.
Aqissiap peqataanini imatut oqaasertalerpaa
- Inuuninni angusama annersaasa ilaat, uanga pillunga piviusulersaarut. Utoqqaliguma kinguaassakka oqaluttuuttalissavakka, taamani uanga pillunga piviusulersaarut pillugu Tuluit Nunannut Premiere-riarterakku.
Aqissiap piviusulersaarummi pingaarnertut oqariartuutigerusuppaa, nammineq misiginikuusani allanik misigineqassanngimmata. Nalaatani sakkortuut qanoq iliorluni qaangersimaneri ersissikkusuppai. Inunnut allanut isumasassarsiorfigineqarsinnissaa neriuutiginerarpaa pingaarnertullu oqariartuutigerusullugu. Sakkussanillu tunisisinnaanissani pingaartissamavai.
- Misiginikuusakka misigisakka, aqqusaakkakka allaniit misigineqannginnissaat. Inuk kinaluunniit taamak atugaqannginnissaa kissaatigalugu. Ajorluinnarmata nalaatakka. Aqissiaq Nuka Semsen taama KNR-mut oqarpoq.
Oqaluttuara allanngueqataasinnaavoq
Suliniuteqalertornikkut meeqqat inuusuttunullu ukkatarinerusariaqarigut, pingaarutilittut eqqaavaa. Iliuuseqalertorneq inuunermilu unammillernartut eqqarsaatillu nuanninngitsut pinaveersaartinnissaat pillugit inuiaqatigiinni oqallittoqarnissaa kissaatigaa.
Aqissiap Nuka Semsen-ip piviusulersaarut isiginnaaramiuk attortippoq. Siullermik isiginnaaramiuk nukiit atornikuusimasani anniaatigisimasaalu kingumut eqqaavaai.
- Sakkortuvoq, kisianni pikkunartumik, KNR-mut oqarpoq.
Piviusulersaarusiaq festival-mi pingasoriaq takutinneqarpoq kusanavissumillu utertitsivigineqarput.
Ilaatigut uku nunap inoqqaavineersut amerlasuut ilisarisinnaallugu – ilisarnartoqartoq arlalitsigut naak atukkat assigiinngikkaluartut. Kisianni eqqartukkagut assigiitsissinnaasimavaat. Piviusulersaarut takutereerneqarnerup kingorna Aqissiaq filmiliortartullu pilluaqquneqaqattaarput, sapiissuseqarnerannut ammaneranullu.
- Naak sakkortugaluartoq qujallutik peqataasinnaagamik isumassarsiorfigisinnaasumik oqalullutillu kalaallit nunaanniinaanngittoq taanna ajornartorsiut piusoq, ersarissivoq nunarsuaq tamakkerlugu oqallinnissaq ajornartorsiutaasoq. Aqissiaq Nuka Semsen oqaluttuarpoq.
