Vittus Qujaukitsoq: Inuunera allanngunngilaq
Vittus Qujaukitsoq angerlarsimaffimmi aneersuartarfiani avammut qimerloorluni qeqqisimavoq, seqernup qinngorsimavaa putsermalli avammut isikkivik ersinngilaq. Assi Qujaukitsup qanoq maannakkorpiaq inissisimaneranut tulluartorujussuuvoq. Nunatsinnini partiip annersaata siulittaasussaatut sassarneranut atatillugu ukkatarineqaqaaq tusagassiutinilu sammisaaqaluni, siunissaali erseqqinngilaq.
Siumumi siulittaasumut qinersinissamut nunatsinni maanna siuttumut unammillernerminut qanoq piareersaateqarnersoq tusarniaaffigalugu KNR-ip Qujaukitsoq pulaarpaa.
Siumumi ilaasortat marluk kanngunarsaasutut eqqartuussivimmut suliassanngortissimallugit Qujaukitsumut pulaarnermi eqqaasaata siulliit ilagaat. Taassuma oqaluttuassartaa tassaavoq Vittus nunanut allanut naalakkersuisuunermini Kinamut pisortatigoortumik tikeraarnermini aalakoorsimaneragaasimavoq tamannalu naalakkersuisunit soraarsitaaneranut peqqutaanerarneqarsimalluni.
Qujaukitsoq naapertorlugu tusatsiakkat eqqunngitsut imaaginnavipput.
- Siulittaasumut qinersinissamut Siumumi ilaasortanit tatiginassusera apeqquserniarneqarpoq pasinarsarniarneqarlungalu, Qujaukitsoq oqarpoq. Taamaakkaluartoq eqqissisimavoq.
- Annilaangassutissaqanngilanga, Qujaukitsoq erseqqissaavoq.
Siulittaasumut qinigassanngortittoq maannakkorpiaq suliffeqanngilaq. Taamaammat siulittaasumut qinersinissamut piareersarnissaminut piffissaqarluarsimavoq.
Qujaukitsup qinersinermi oqalugiaatissani qanoq imaqarnera KNR-imut itisilinngilaa, taamaakkaluartoq Siumumi siulittaasutut qinerneqassaguni sorusunnini qularutiginngilluinnarpaa. Kalaallit Nunaata namminiilivinnissaa pingaarnerpaatut sulissutiginiarpaa. Nunarput naalagaaffimmiit tapiissuteqarani sapiginngitsoq, Qujaukitsoq naliliivoq.
Aalisarneq aqqutissaasoq
Namminiilivikkutta aningaasat Danmarkimit nunatta karsianut isertartut 66 procentiisa missaat unissapput, Vittus Qujaukitsulli tamanna ernumaginngilaa. Tassami uumassusilerisut innersuussutaat qaangerlugit aalisarnikkut Nunarput aningaasarsiorluarsinnaanera qularinnginnamiuk.
- Aalisarnermi pisassiissutit maanna atuuttut nunatta imartaata angissusaanut naapertuutinngillat. Atorluaanerusariaqarpugut. Nunatta pissarititai uumassusillit atorluarnerusariaqarpagut, Vittus Qujaukitsoq oqarpoq.
Aalisakkerivissuit aalisartullu maanna pioreersut pisassiissuteqarfigineqarnerulertariaqanngitsut, Vittusip oqaatigaa, suliffeqarfinnulli nutaanut periarfisseerusulluni.
Naalakkersuisuujunnaaraluarluni inuunera allanngunaanngilaq
Qujaukitsup qinersinissamut oqalugiaatissani ulapputigigaluarlugu ulluinnarni ileqquni allanngortissimanngilai.
- Inuunera allanngungaanngilaq, allannguutituaraa naalakkersuisuuniinnittulli ulloq unnuarlu sulisarunnaarnera, Qujaukitsoq oqarpoq.
Ulloq nutaaq aallartikkaangat naluttarfilianngikkaangami pisuttuartarpoq. Ualikkullu nuliani peqatigalugu ernuttatik meeqqerivimmut aasarpaat.
- Ernuttagut ilagisorujussuusarpagut, Qujaukitsoq qungujulluni oqarpoq.
Siumup nuna tamakkerlugu ataatsimeersuarnera sisamanngorpat aallartissaaq sisamanngorpallu siulittaasumut qinersineq aallartissalluni. KNR Siumup Sisimiuni ataatsimeersuarnerani najuutissaaq nutaarsiassiisassallunilu.
