Inunnik isumasiuinermi nutaami Inuit Ataqatigiit Siumumit annerulertoq
Partiit minnerit marluk qinersisartunit pillarneqarlutik qinigaatitaqanngitsuussagaluarput, Inuit Ataqatigiillu Siumumit annerulerlutik nunatsinni partiini annerpaanngussagaluarput.
Ullumikkut qinersisoqartuuppat Inuit Ataqatigiit 30,6 procentinit taaguunneqarlutik annerpaanngussagaluarput, Inatsisartunut siorna apriilimi qinersinermut naleqqiullugu 4,8 procentpointinik siuariassagaluarlutik. Muté Bourup Egede parteeqataalu qulinik ilaasortaatitaqalissagaluarput.
HS Analyselli Sermitsiaq.AG sinnerlugu inunnik isumasiuinerata aamma takutippaa Siumut qinersinermut kingullermut naleqqiullugu 1,3 procentpointinik siuariaateqassasoq, ilaasortaatitaasalu ataatsimik ilallutik. Siumut Inuit Ataqatigiillu tamarmik qulinik taava ilaasortaatitaqalissagaluarput.
Demokraatit aamma siuariaateqalaassagaluarput, 21,2 procentinit taaguunneqarlutik 1,5 procentpointinik siuariaateqassagaluarlutik. Demokraatit taamaasillutik arfineq-marlunnik ilaasortaatitaqalissagaluarput.
Parteeqqat qinersisitsisinnaanerup ammut killinga angunngitsuussagaat
Nunatta Qitornai Suleqatigiissitsisullu qinersisitsisinnaanerup ammut killinga angunngitsuussagaluarpaat, taamalu qinigaatitaqanngitsuussagaluarlutik.
Atassut aamma kinguariaateqalaassagaluarpoq, qinersinermut kingullermut naleqqiullugu 1,5 procentpointinik kinguariarlutik 4,5 procentit missaannit taaguunneqassagaluarlutik, ilaasortaatitaallu marluk ataatsimik ilanngassagaluarlutik.
Partii Naleraq partiit akornanni kinguariaateqarnerpaassagaluarpoq, kingullermik qinersisoqarneranut naleqqiullugu 3,3 procentpointinik kinguariaateqarluni 10,3 procentinit taaguunneqassagaluarlutik.