VIDEO Inuk Hostels nuummiunit ornigarneqarluartarpoq

Nuup ilaani Qernertunnguani, Inuk Hostels innuttaasunit soqutigineqarlunilu pisariaqartinneqarsimaqisoq ornigarluarneqartarpoq.

- Malugiartuinnaratsigu soorlumi atorfissaqartinneqarsimasoq, amigaatigineqarsimasoq, eqqissisimasumi pinngortitarsuaq kangerluk isiginnaajutigalugu kaffisorluni imaluunniit unnukkut nerilluni, taamaammat eqqarsaraluttuinnarpugut immaqa ukioq naallugu ammatissallugu, tassami ammatiinnalissallugu cafém, Inuk Hostelsimi ingerlatsisoq, Lise Egede Hegelund, KNR-imut oqarpoq.

Sutorniartarfiup Inuk Cafép soqutigineqarnerata saniatigut sinerissamiit Nuummut tikeraat takornarialluunniit unnuisarfinni unnuissallutik soqutiginnilluarput.

- Tupalaartorujussuuvunga nuannaarlungalu assut, maani nunatsinninngaanniit ’takornariat’, tassami aamma uagut nammineq nunatsinni takornariartaleratta, takornariat aamma amerlapput maani unnuisartut, Lise Egede Hegelund oqarpoq.

Unnuisarfiillu, vandrerhjemminik pisagaat nalinginnaasuunngillat.

- Vandrehjemmini allani imaakkajuppoq, inersuaq siniffippassualik, kisianni ukunani illuaraapput taava ineeqqat sisamat marluuttarisat, illuaqqami ataatsimi, illuaqqallu sisamaallutik, Lise Egede Hegelund oqarpoq.

Inuk Hostels innuttaasunit alutorineqaannanngilaq suleqataasuniilli eqqissisimanartinneqaqaaq.

- Ingammik isikkivik, soorlu ilaatigut maaniittoqartilluni imaluunniit konferencertoqartillugu maani arferit nuisut, puisit arlaat, nuannertorujussuuvoq eqqissisimanarlunilu. Stressertumiinngitsoq illoqarfimmi soorlu eqqarsaatigalugu taamatut, Julia Josefsen, takornarialerineq pillugu ilinniartoq KNR-imut oqarpoq.

Inuk Hostelsip sutorniartarfiani Café Inummi ullumi tallimanngornermi nereqatigiinnertalimmik unnussiuaaqatigiittoqarnissaa pilersaarutaavoq.