inuk Designip Air Iceland suleqatigileraa

Islandimiut timmisartortitseqatigiiffiat Air Iceland Nuummi suliffeqarfimmit inuk Designimeersunik nioqquteqalerpoq.
Assi © : inuk Design
Allattoq Karsten Sommer
februaarip 17-at 2016 05:54
Nutserisoq Simon Uldum -

Suliffeqarfiup ilusilersugaanik nioqqutissiat Reykjavikimi akitsuutitaqanngitsunik pisiniarfimmi Air Icelandillu timmisartuutaani Nunatsinnut angalasartuni nioqqutigineqalerput.

Tamannalu inuk Designimeersut Liss Stenderip Peter Jensenillu nuannaarutigaat.

- Nioqqutissiatta ilaannik Reykjavikip Timmisartoqarfiani akitsuutitaqanngitsunik pisiniarfimmi timmisartortitseqatigiiffiullu timmisartuutaani Nunatsinnut angalasartuni tuniniaarusunnersugut Air Icelandimit aperineqaratta tupaallaatigeqqaarparput kingornalu nuannaartupilussuanngorluta, Liss Stender oqarpoq.

Taama periarfissinneqarneq uatsinnut alloriarneruvoq angisooq. Nioqqutissiavut pisisartunut amerlanerusunut taamaalilluta nittarsaassinnaanngorpagut nioqqutissiatsinnillu amerlanerusunik tunisaqarnissatsinnut neriulersitsilluni, Liss Stender taama itisiliivoq.

Aamma atuaruk ASSIT Kalaallit Nunaannut pilerisaarummik Reykjavikimi ammaasoqarpoq

Inuk Design Air Greenland Kangerlussuarmilu pisiniarfiit aqqutigalugit tuniniaarusukkaluarpoq.

- Air Greenland iluatsinniarsarigaluaratsigu itigarparput. Nunatsinni niuerfimmi tuniniaanissaq naatsorsuutigisatsinnit ajornarnerusoq taamaalilluta paasivarput.

Paarlattuanik Islandimi ajornannginneruvoq.

- Sanilivut Islandimiut pikkorissorsuupput nutaanillu pilersitsisartunut siuarsaaniarlutik immikkuullarissumik periarfissaqartitsillutik. Nunatsinni nutaanik pilersitsisartut inerisaaffigineqalerpata Ilinniarfigilluarsinnaavagut, Liss Stender taama naggasiivoq.