Inuit TV-kanali nutaaq Canadami aallartilerpoq
Kanaali nutaaq Inuit TV-mik taaguuteqassaaq. Taanna Inuktut oqaasertalinnik aallakaatitsisassaaq. Inuktut Inuit sumiorpaluutaanni ataatsimut ilisarnaataavoq.
Filimini ilitsersuisartoq ilisimaneqarluartoq, Alethea Arnaquq-Baril kanaalimi nutaami pisortaavoq, taassuma CBC-p nittartagaanut Eye on the Arctic-imut Inuit TV aamma kalaallisut oqaluttunik aallakaatitsisassasoq oqaatigaa.
Eye on the Arctic naapertorlugu Inuit TV-p, inuit piorsarsimassusaat, oqaasii ilinniartitaanerlu sammisarissavaat.
Inuit filimiliaannik nipilersuusiaannillu siammarteriviulluassasoq naatsorsuutigineqarpoq, filmiliornernillu amerlanernik suliaqartoqalersinnaaneranik neriuuteqarfigineqarluni.
Kanalini pigineqartuni, tassa CBC-mi APTN-imilu Inuktut aallakaatitat naammanngitsut, Alethea Arnaquq-Baril oqarpoq. Taamaammat nutaamik kanaliliortoqalerpoq.
Nunavut Tunngavik aningaasalersuissasoq
TV-kanaliliornissaq pisariaqarsimavoq, inuimmi issittumi najugallit amerlasuut internetsimik sukkasuumik attaveqanngillat.
Piareersarnerit aallartilluareeput pisortatigoortumik akuersissutimmik qinnuteqaat Canadami oqartussanut nassiunneqareerpoq, Nunavut Tunngavillu Inuit TV-mut ukiuni siullerni pingasuni aningaasalersuissaaq.
Nunavut Tunngaviup aallakaatitsisalernissani ukiaru aallartissasoq ilimagaa, tamakkiisumillu 2021-imi aallakaatitsisalissalluni.
AAMMA ATUARUK Mine egne følelser er blevet til filmen Anori
Kalaallillumi filmiliaat Canadap issittortaani soqutigineqarput, TV-qarfiummi APTN-p Pipaluk Kreutzmann Jørgensenip filimiliaa "Anori" juulip qaammataata qiteqqunnerani takutippaa.