Inuit tuusintilikkuutaat Nagorno-Karabakhimit qimaajuarsinnartut

Inuit tuusintilikkuutaat Aserbajdsjanimi nunap immikkoortuanit Nagorno-Karabakhimit qimaajuarsinnarput. Armeniamiunit kingoqqisut Nagorno-Karabakhimi amerlanerussuteqarput.

Inuit 13.550-it sinnerlugit nunap immikkoortuanit tassannga Armeniamut qimaasimasut, Armeniami naalakkersuisut marlunngornermi nalunaarutigaat. Nutaarsiassaqartitsivik AFP taama allappoq.

Aserbajdsjanip Nagorno-Karabakh sapaatit akunnerata siuliani aqutsisuuffigilerpaa. Nagorno-Karabakh Armeniamiunit kingoqqisunit amerlanerussuteqartunillu ukiuni qulikkuutaani aqunneqarpoq.

Armeniamiunit kingoqqisut 120.000-t Aserbajdsjanip ataani inissisimajunnaarusuttut Armeniamiusut kingoqqisut aqutsisuisa oqaatigaat.

Taakku Aserbajdsjanimit malersorneqalernissartik ernummatigaat, naak Aserbajdsjanimi naalakkersuisut oqaatiginikuugaluaraat taakku isumannaatsuunissaat qulakkeerumallugu neriorsuutiginikuugaluaraat.

Qimaasut 40.000-t tikilluaqqusaajumaartut

Armeniamiunilli kingoqqisut Aserbajdsjanimi inuiaqatigiinnut akuunerulernissaannut suliniuteqarniarnertik Aserbajdsjanip oqaatiginikuuaa, naligiinnerusumik innuttaassuseqalernissaat anguniagaalluni.

BBC taama allaaserisaqarpoq.

Armeniap Aserbajdsjanillu naalakkersuisuinut sinniisut Bruxellesimi ullumi marlunngornermi ataatsimiissapput. Nagorno-Karabakhimi sapaatit akunnerata siuliani eqqissiviilliortoqalerneraniit siullerpaamik naapissallutik.

Nunat marluk naalakkersuinikkut siuttui kingorna taava naapissapput, tamannnalu qaammatip tulliani pinissaa pilersaarutigineqarluni.

Qimaasut 40.000-t pallillugit Armeniamut tikilluaqqusaajumaartut Armeniami ministeriunerup Nikol Pashinyanip oqaatigaa.