Inuit tamat oqallittarfiini oqaatsit atorneqartut sakkortusiartorput
Inuit qarasaasiaq atorlugu attaveqaqatigiittarfiini oqaatsit sakkortuut ilaatigullu ilukkut annernarsinnaasut atugaaneruleriartorput - taamaattoqarnerali allatigut iluaqusiisarmat ulorianartutut isigiinnagassaanngitsoq, Ilisimatusarfimmi rektorip, attaveqaqatigiittarfinnilu oqaatsinik atorneqartunik ilisimatusarsimasup, Jette Rygaardip oqaatigaa.
- Iluaqutit ilagaat, inuit qarasaasiaq atorlugu attaveqaqatigiiffiisigut oqaatsinik kusanaatsunik annissuinermi, inuiaqatigiit akornanni timikkut annersaanerit pinngitsoortinneqarsinnaasarmata.
Ilisimatusarfimmi rektori, Jette Rygaard oqarpoq, taanna ukiuni 20-ni Nunatsinni najugaqareerpoq, attaveqaqatigiinnilu oqaatsinik atuinerup ineriartornera malinnaavigisimallugu ilisimatusarfigisimallugulu.
Ukiuni kingullerni oqallisaanerpaanut ilaavoq kalaallit oqaatsitta atugaanerat. Tamannalu isummersorfigineqarnerpaanut ilaalluni.
Tamassumunnga assersuutissatut taaneqarsinaavoq, Aningaasaqarnermut Naalakkersuisuusimasup, Maliina Abelsenip aningaasanut inatsit Inatsisartut oqaluttarfiatigut kalaallisut oqalulluni siorna ukiakkut saqqummiussinera.
Maliina Abelsenip saqqummiussinerata aqaguani tusagassiutinilu sammineqarnerata kingorna, qarasaasiatigut attaveqaqatigiittarfiit ilaanni atuarneqarsinnaavoq, Maliina Abelsenip kalaallisut oqalulluni saqqimmiussinera pillugu, Siumup inuusuttaasa siulittaasuata oqaatsit kusagisassaanngitsut atorlugit isornartorsiuinera.
Tamatuma kinguneraa attaveqaqatigiittarfinni oqallinnerujussuup pilernara, ilaatigut oqaatsit kusananngitsut atorneqarlutik. Tamatumalu kinguneraattaaq Siumup inuusuttaasa siulittaasuata tununuarniuteqarneranut.
- Maliina Abelsenimut isornartoriuisoq imminut aaginnartutut oqaatigisariaavoq, tassami qinngarsuinerit tamarmik tassunga saatinneqarmata. Oqallinnerli ataatsimut isigalugu soqutiginartupilussuugaluarpoq naak oqaatsit atorneqartut sakkortugaluaqisut, Jette Rygaard oqarpoq.
Siumup inuusuttaata siulittaaasuanut oqaatsit atorneqartut, Sermitsiaq.ag-mit atuarneqarsinnaasut ilaatigut imaapput: 'Ilaa aa!!! Illit kanngunaqaatit!!!Taama eqqaarsartaaseqaruti imminut nikangisimassaqaatit. Qallunaatoorsinnaannginnavit? Qallunaatut oqalunnermut ilinniartissavakkit? Taamaalioruma taava kalaallisut allattariarsornermik ilinniartissavinga? Atuartartut ilaat taama qisuariaateqarpoq.
Atuartartunit allanit paatsoorneqassanngikkaanni, isornartorsiuinermi oqaatsit atorneqartut mianersuunneqartariaqaraluartut, Jette Rygaardip naqissuserpaa.
- Tusagassiivinni killeqanngitsumik oqallinnerni misigissutsit tupinnanngitsumik qaffakaarujussuartinneqartarput. Taamaattorli paatsoorneqassanngikkaanni oqaatsit mianersortumik atornissaat pisariaqarpoq.
Ilisimatusarfimmi rektorip, Jette Rygaardip aamma naqissuserpaa, naak oqaatsit atorneqartartut kusananngikkaluartut, qarasaasiatigut attaveqaqatigiittarfinni oqallittarneq inuit pisinnaatitaaffigimmassuk tamanna imaaliallaannaq allanngortinneqarsinnaanngitsoq
