Inuit pisinnaatitaaffii pillugit siunnersuisoqatigiit aningaasanik amigaateqartut inatsimmillu naammassinnissinnaanngitsut

Nunatsinni Inuit Pisinnaatitaaffii pillugit Siunnersuisoqatigiit piumasaqaatinik naammassinninnissaminnut Naalakkersuisunit aningaasanik pingasoriaataasunik noqqaassuteqarput.
Menneskerettigheder, rapport
Nunatsinni inuit pisinnaatitaaffii pillugit siunnersuisoqatigiit nunatsinni inuit pisinnaatitaaffiinik siuarsaanissaannut illersuinissaannullu 915.000 koruunit aningaasaliissutigineqartarput. Assi © : KNR
Allattoq Jens Betak
maajip 05-at 2021 05:40
Nutserisoq Connie Fontain

915.000 koruunit.

Aningaasat Nunatsinni Inuit Pisinnaatitaaffii pillugit Siunnersuisoqatigiit Naalakkersuisunit ukiut tamaasa pissarsiarisartai taama annertussuseqarput, siunnersuisoqatigiillu aningaasat taakku atorlugit nunatsinni inuit pisinnaaffii pillugit siuarsaallutillu illersuisussaapput.

Tamatuma saniatigut siunnersuisoqatigiit najoqqutassanik arlalinnik suliassaqarpoq – ilaatigut pisortanut inuinnarnullu inuit pisinnaatitaaffiinut tunngasunik siunnersuisartussaalluni.

Inuit Pisinnaatitaaffii pillugit Siunnersuisoqatigiit pillugit inatsisimmik toqqakkat:

  • Kalaallit Nunaanni inuit pisinnaatitaaffii pillugit ataatsimut isigalugu ilisimasanik piginnaasanillu annertusaanermut suleqataasussat.
  • Inuit pisinnaatitaaffiisa siuarsarneqarnissaat illersorneqarnissaallu.
  • Kalaallit Nunaanni inuit pisinnaatitaaffiinut pissutsit pillugit nakkutilliinermut nalunaaruteqartarnermullu  peqataanerit
  • Inatsisartunik, Naalakkersuisunik oqartussaasunillu allanik aamma namminersorlutik suliaqartunik siunnersuinerit
  • Inuit pisinnaatitaaffiinik ilinniartitsinermik tapersersuineq siuarsaanerlu
  • Inuit pisinnaatitaaffii pillugit paasissutissanik siammarsaanermut peqataaneq,
  • inuit pisinnaatitaaffiisa patajaallisarneqarnissaat siunertaralugu ingerla­tassanik siunnersuuteqarneq

Tigusiffik: Inuit Pisinnaatitaaffii pillugit Siunnersuisoqatigiit pillugit Inatsisartut inatsisaat nr. 20, 27. november 2018-imeersoq.

Siunnersuisoqatigiinni ilaasortat qulit nammineq kajumissutsiminnik suliaqartuupput, siunnersuisoqatigiilli Naalakkersuisunit aningaasat pissarsiarisartakkatik atorlugit inatsisitigut piumasaqaatinik najoqqutassanik imaluunniit innuttaasunut inuit pisinnaatitaaffiinik illersuisuisuunissamik suliaqarnissaannut naammanngillat.

Tamannalu naggaterpiaaani innuttaasunut kingunerluttartoq, Inuit Pisinnaatitaaffii pillugit Siunnersuisoqatigiinni siulittaasuugallartoq, Ludvig Larsen isumaqarpoq.

- Inatsisartummi inatsisiliaat tamarmik nakkutigisussaavagut. Tamanna ineqarnermut tapiissuteqarnermut imaluunnit suliffimmik annaasaqarnermut suliamut tunngasuusinnaavoq, inuiaqatigiit innuttaasutut qanoq pisinnaatitaaffeqarnerminnik qanorlu iliuuseqarsinnaanerminnik ilisimanninnissaq pisinnaatitaaffigaat, siulittaasuugallartoq, Ludvig Larsen oqarpoq.

Aningaasarpassuit

Taamaammat siunnersuisoqatigiit Naalakkersuisunit aningaasanik amerlanerusunik pisortatigoortumik najoqqaassuteqarput. Siunnersuisoqatigiit ukiup tullissaanut missinnersuutinut aningaasanik qanoq annertutigisunik atuinissaminnut ukiut tamaasa apriilip qaammatani siunnersuuteqartartussaapput, taakkuli Naalakkersuisut aalajangiiffigisarpaat.

Siunnersuisoqatigiit tamatumuuna annertunerungaatsiartunik noqqaassuteqarput. Tassa 3,2 millionit koruunit – tassa imaappoq pingasoriaataanik annertussuseqartut – tamannalu piumasaqaatinik naammassinninnissamut pisariaqartoq siulittaasoq naliliivoq.

AAMMA ATUARUK Tre rapporter kritiserer menneskerettigheder i Grønland

Siunnersuisoqatigiit oqarnerat naapertorlugu aningaasanik annerusunik noqqaassuteqartuarput, siunnersuisoqatigiilli 2013-imili pilersinneqarnerannit Naalakkersuisut aningaasat tunniunneqartartut 900.000 koruunit missaanniitsittuarsimavaat.

- Ukiut tamarluinnaasa sunut akissaqarnerluta sumi sipaarniassanerluta paasiniarlugu aningaasat tamarluinnarmik misissortarpagut, tamanna qatsupparput. Taamaammat Inatsisartut Naalakkersuisullu tamatumuuna tusaaniassagaatigut neriuutigaara, taamaalilluta suliagut torersumik suliarisinnaassallutigit, Ludvig Larsen oqarpoq.

Tamanna pingaartumik 2018-ip kingorna inatsit allanngorneqarmat ajornartorsiutaalerpoq, siunnersuisoqatigiillu namminersornerulertussanngorpoq. Tassa imaappoq siunnersuisoqatigiit Namminersorlutik Oqartussat allaffeqarfia naalakkersuisoqarfiit assigiinngitsut ataanni allaffeqarfigisimasaminnit anisussanngorput.

Allaffiit allatsilu

Siunnersuisoqatigiilli Namminersorlutik Oqartussanit nuunnerata kingunerisaanik ininik attartornermut, allatsimut allarpassuarnullu aningaasartuutit nutaat takkussuutileriataarput. Naalli aningaasartuutit annertusigaluartut Naalakkersuisunit aningaasaliisoqartarnera allanngunngilaq.

- Naalakkersuisoqarfimmit nuunnitsinni aningaasalersorneqarneq malinnaanngilaq. Tamanna inatsisilerituunik qaffasissumilluunnit allamik ilinniagalimmik suliaqarnitsinni atuinissatsinnut akissaqannginnitsinnik ilaatigut isumaqarpoq, Ludvig Larsen oqarpoq.

AAMMA ATUARUK Råd for Menneskerettigheder skal fjernes fra Selvstyretårnet

Siunnersuisoqatigiit 1,6 millionit koruuninik siorna aningaasartuuteqarnissamut missingersuuteqarneranik kinguneqarpoq, ilisimaneqartutulli siunnersuisoqatigiit 915.000 koruuninit annerusunik pissarsineq ajorput, taamaammat aningaasartuutit qaammatip siuliani ataatsimiinnermi annikillisarneqarput.

Angalanermut aningaasartuutit tamarmik unitsinneqarput, siunnersuisoqatigiinnut ilaasortassarsiornermut, oqalutseqarnermut allaffinnillu attartornermut aningaasartuutit annikillisaavigineqarput siunnersuisoqatigiillu aningaasartuutissanut ilimaginngissanut maanna akissaqanngillat.

Inuit Pisinnaatitaaffii pillugit Siunnersuisoqatigiit aningaasalersorneqartarnissaat aningaasanut inatsit pillugit upernaamut isumaqatigiinniarnerit ilagissavaat.

Aningaasanut inatsit kingulleq naapertorlugu siunnersuisoqatigiit aningaasalersorneqarnerat ukiunut tulliuttunut taamaaginnassasoq tunngaviuvoq, tamannali ukiut tamaasa isumaqatigiinniutigineqarsinnaavoq.