Angutit pingasut Saudi-Arabia sinnerlugu killitsissiatut pasineqarlutik unnerluutigineqartut
ASMLA-mi siuttut pingasut Saudi-Arabia sinnerlugu kilitsissiatut 2012-imit 2018-ip tungaanut sulisimasutut pasineqarlutik Danmarkimi tigusarineqarput.
Politiit isertortumik paasiniaasartuisa pisortaat, Finn Borch Andersen, tusagassiortunik ataasinngornermi katersortitsinermi taama ilisimatitsivoq.
Iranip kimmut kujasissortaani nunaminertap illoqarfik Ahwaz pingaarnertut illoqarfigalugu naalagaaffinngortinneqarnissaa ASMLA-p (Arab Struggle Movement for the Libération of Ahwaz, aaqq.) anguniagaraa.
Iranimi oqartussat naapertorlugit ASMLA peqqarniisaarniaqatigiiupput.
Angutit pingasut tigusarineqartut Iranimi 2018-imi septembarimi peqqarniisaarniartoqarneranik nersorinnissimasutut unnerluutigineqareerput, tamannalu pillugu Ringstedimi najugaqarfiat tv-qarfiallu 2018-imi novembarimi pakasaalluni misissuiffigineqarlutik.
AAMMA ATUARUK EU-p Iranimut killersuilernissaa Samuelsenip neriuutigaa
- Pakasaalluta misissuiffigereernerisa kingorna Sjællandip qiterpiaani kippasissuanilu politiit suleqatigalugit isertortumik annertuumik paasiniaaqqissaarpugut.
- ASMLA-mi siuttut pingasut taakkua tigusarineqarlutillu kilitsissiatut sulisimasutut unnerluutigineqarnerannik tamanna kinguneqarpoq. Angutit taakkua Saudi-Arabia sinnerlugu kilitsissiatut 2012-imit 2018-ip tungaanut sulisimasut, politiit isertortumik paasiniaasartui (PET) isumaqarput, Finn Borch Andersen oqarpoq.
ASMLA-mi siuttut ilaata Ringstedimi toqutaanissaa PET-p siorna ukiakkut ernummatigaat.
Angutit pingasut taakkua PET-mit tamanna pillugu paarineqalerput, kilitsissiatulli aamma sulisimasutut pasineqarlutik.
- Inuit sioorasaarneqarsimasut paarinissaannut pisussaatitaaffeqarpugut, Finn Borch Andersen oqarpoq.
- Sioorasaarneqartunik sioorasaarisunillu illersuisussaavugut, Finn Borch Andersen oqarpoq.