Tasiilami aallaasersorneq: Inuit marluk tigusaasut

Politiit pigaartuisa pisortaata oqaloqatigereernerani nalunaaqutaq 10.18 nutarterpoq.  

- Illoqarfimmi ernumanartueruppoq. 

Kalaallit Nunaanni politiit Facebookimi taama allapput. 

Angutit marluk marlunngornermi unnukkut aallaasersortutut pasisat tigusaareersullu, Kalaallit Nunaanni politiit taama nalunaarput.

- Seqqorpallattoqarneranik tusaasaqarsimasunit attavigineqarpugut, politiit pigaartuisa pisortaat Peter Bauer oqarpoq.

Tasiilami politiit nalunaaqutaq 19.50 nalunaarfigineqarput.

Taamungaannaq eqqartoqartoq

Marloriarluni pingasoriarluniluunniit oqaluffiup eqqaani angerlarsimaffiit ilaanni eqqartoqarsimasoq erserpoq. Arlannaannulluunniit igeriartoqarsimanngilaq.

- Taamungaannaq eqqartoqarsimavoq, Peter Bauer oqarpoq.

Politiit eqqartoqarsimaneranik suli misissueqqissaaleruttortut, taanna ilisimatitsivoq. Politiit qanorpiaq pisoqarsimaneranik paasiniaallutik ilisimannittunik aamma apersueqqissaaleruttorput.  

Angutit marluk, aappaa 20-t sinnerlugit ukiulik aappaalu 30-t sinnerlugit ukiulik, aallaasersorsimasutut pasisaapput.

Angutit marluk taakku imigassartorsimanersut politiit pigaartuisa pisortaat aperigatsinni ima akivoq:

- Politeeqarfiup isertitsiviani unnuisitaapput, taama oqaannarsinnaavunga.