Politiit ullormut nalunaarutaat: Inuit marluk biilinik Nuummi ajutoorujussuartillutik ajoquserput
Inuit marluk biilinik Nuummi unnuaq pingasut missaanni 400-rtalikkoortillutik ajutoorsimasut, Kalaallit Nunaanni politiit pigaartuisa pisortaat Jeppe Andsager marlunngornermi ullaakkut oqarpoq.
- Biilinik ajutoortut marluusut ajoqusersimapput. Ajoqusersimasut massakkorpiaq qanoq innersut naluara, suliarlu taanna pillugu itinerusumik oqaaseqarsinnanngilanga, politiit pigaartuisa pisortaat oqarpoq.
Biililli ajutoortut ikuallassimasut, taanna uppernarsaavoq. Biililli ajutoortut sooq ikuallalersimanersut qanorpiarlu pisoqarsimanersoq oqaatigisinnaanngikkallarini, taanna aamma oqarpoq.
Pisumik suli misissoritsik 400-rtalillu matoqqagallarmat, Nuummi aqqusinikkut marlunngornermi angallanniarnerup erloqinarsinnaasarumaarnissaa piareersimaffigeqqunartoq, politiit ilisimatitsipput.
Biilinik Mercedesinik aappaluttunik unnuaq pingasut missaanni takunnittoqarsimappat politiinut attaveqaqqunartut, Jeppe Andsager aamma oqarpoq.
Politiit oqarasuaataannut 70 14 48-mut sianerfigalugit attavigineqarsinnaapput.
Pisoq pillugu suliaq sumut killinnersoq ullup ingerlanerani malinnaaffigissavarput.
