Inuit kommunini tamaniittut coronavirusimut misissorneqartut

- Kikkut tunillatsissimanersut nalugutsigit nunarsuaq tamakkerlugu tunillaassuunneq una unitsissinnaanngilarput. Nunanut tamanut oqariartuutissarput ajornaatsunnguuvoq: misissuineq, misissuineq, misissuineq. Pasitsaanneqartut tamarmik misissorsigit.

Nunat tamalaat peqqissutsimut suleqatigiiffianni qullersaq, Tedros Adhanom Ghebreyesus marsip 16-iani tusagassiortunik katersortitsinermi ersarissumik taama nalunaaruteqarpoq.

Nunatsinni misissuineq qanoq ingerlava?

Nunatsinni coronavirusimik tunillatsissimanersut misissorneqartut katillugit 265-iupput, taamaalilluni misissorneqartut innuttaasoqassuseq aallaavigalugu Danmarkimi misissorneqartunit amerlanerupput. Kikkulli tamarmik misissortissinnaanngillat.

Peqqinnissaqarfik imaluunniit coronamut apeqquteqarniarluni sianertarfik attavigigaanni coronavirusimullu assingusunik ersiuteqarneraraanni misissortittoqarsinnaanngilaq, aatsaat nunatsinni tunillatsissimasutut paasineqartut arlaat naapissimagaanni misissortittoqarsinnaalluni.

- Misissuiniarnitsinni inuup ersiuteqarnissaa tunillatsissimasumullu atassuteqarsimanissaa attapparput, nakorsaaneq, Henrik L. Hansen oqarpoq.

Nakorsaaneqarfiup WHO-p innersuussutai nunatsinnut atuuttussaasorinngilai. Nakorsaaneqarfiup innersuussutigineqartoq nappaammik siaruaattoqarfinni ersiuteqartunik tamanik misissuinissamut innersuussutaasoq isumaqarpoq, nunatsinnilu tamaattoqanngitsoq nakorsaaneqarfik isumaqarpoq.

Nakorsaaneqarfik isumaqarpoq, nappaat pakkersimaarneqarluartoq, taamaalillunilu tunillatsittut maannamut tallimaannaasut, amerlanerusunillu misissuileraluarunik tunillatsittunik amerlanerusunik paasisaqarfiussagunanngilaq.

Taassumali Nakorsaaneqarfiup tunillatsissimasunut qanoq qanitsigisumik attaveqarsimasariaqarnermut isiginninnini misissuisarnerminut annertusivaa.

- Ulluni kingullerni qulakkeersimaneruniarluta siammasinnerusumik isiginnippugut, nakorsaaneq, Henrik L. Hansen oqarpoq.

Coronamut misissorneqartut amerliartortut

Nakorsaaneqarfik amerlanerusunit misissuivoq, tunillatsittoqarneranilu misissuinerit amerlassusaat qaffaqqittarpoq. Nunatsinni tunillatsissimasoq siulleq marsip 16-iani paasineqarpoq.

AAMMA ATUARUK Nunatsinni inuk ataaseq coronavirusimik tunillatsissimasoq

Nakorsaaneqarfiulli pissutsit nakkutigilluarneqarsorai, tassami inuk tunillatsissimasoq nunanit allanit tunillatsissimanera uppernarsarneqarsinnaammat, tunillatsissimasorlu nunatsinni allanut tunillaasimanani.

Inuk alla coronavirusimik tunillatsissimasoq marsip 18-ianni paasineqarmat oqartussat sillimaniarnerulerneq aallartippaat. Taannami angalasimanngilaq, taamaammat Nuummi tunillatsissimanissaa ilimagineqarpoq.

AAMMA ATUARUK Nunatsinni coronavirusimik tunillatsissimasoq alla paasineqartoq: Nuuk matuvoq

Nuuk tuniluuttoqarnissaanut aarlerinartoqarfiulerpoq, Naalakkersuisullu illoqarfiit pingaarnersaata mattunnissaa aallarnerpaat, taamaalilluni virusi Nuummiiginnartinniarneqarluni.

Tunillatsissimasup aappaata aamma Tunillaassortunik nappaalanersuaqarneranut ataatsimiititaliarsuup inunnik qaqugukkut misissuisarnissamut periusissaanut allanngortitsisuuvoq.

Inuit ersiuteqartut nunanilu aarlerinaateqarfiusuniissimasut kisimik misissorneqartaraluarput. Nuummili pasitsaanneqartut amerlanerungaatsialermata tassanngaannartumik tuniluuttoqarnissaanut aarlerinaateqarfiulerpoq.

Iliuusissiap allanngorneratigut misissorneqartut amerleqqipput. Piffissami marsip qulingiluaanit marsip 18-ianut coronavirusimik misissorneqartut 44-nngorput, taakkulu ulluni tulliuttuni sisamani 194-inut amerlipput.

Misissuisoqarnerulernera peqqinnissamut oqartussat virusip Nuummiit tuniluutinnginnissaanik qulakkeeriniarneraat.

- Nunatsinnut tuniluuttoqangaatsialernissaanik pinaveersaartitsigallarpugut, pinaveersaartitsinermillu sammisaqarnerput peqqinnissaqarfiup tunillatsinnikorpassuarnik isumaginninniarnissaata ajornakusoortussaaneranik pissuteqarpoq, nakorsaaneq, Henrik L. Hansen oqarpoq.

Peruluttut inaanni inissat sisamat

Nunarsuarmi sumiiffippassuarni peqqinnissaqarfiit corovirusimik tuniluuttoqarnera pissutigalugu ilungersuuteqangaatsiarput, coronamimmi tunillatsissimasut ilaat isumagineqangaatsiarnissaat pisariaqarpoq.

Virusit ilisimaneqartut amerlanerpaartaat anersaartorfiit aqqutaatigut – assersuutigalugu toqqusaakkut aattuisartut ilisimaneqarpoq. Tamanna coronavirusimik tunillatsissimasut amerlanerit aamma akornanni nalaanneqartarpoq. Inuilli ilaat assersuutigalugu timimikkut akiuussutissakitsut imaluunniit nappaatigiuagaqartut tunillatsikkaangamik virusi anersaartorfiisa aqqutaat qaangerlugu puaanni aseruuttoortitsisinnaasarpoq.

Tamanna anersaartorniarnermut ajornakusoortitsilersarpoq, taamaalilluni napparsimasut eqqugaanerpaasut anersaartuummik ikiorneqarlutik anersaartortinneqartariaqarlutik.

AAMMA ATUARUK ASSILIARTAT: Coronavirusi timimi ima iliortarpoq

Nunatsinni peruluttut inaanni taama napparsimasunik isumaginniffiusinnaasumi inissat sisamaapput. Taakkulu Nuummi napparsimmavimmiillutik.

Peruluttut inaanni inissat sisamat saniatigut immikkoortunik eqqugaanerpaanut inissaliarineqarsinnaasoqarpoq.

Atortorissaarutissallu killeqarnerat nakorsaanerup ernumatiginngilaa. Atortorissaarutimmi taakku immikkut ittumik ilinniarsimasunit isumagineqartussaapput, nunatsinnilu inuit taakku amerlanngillat.

AAMMA ATUARUK Tamaat isigalugu: Coronavirus pillugu killiffik

Sulisut ilarparujussui paarlattaasuupput, soorlu sinitsitsisarfimmi peruluttullu inaanni peqqissaasut taakkulu coronavirusimik tunillatsissimasunik isumaginninnissamut nutaanik ilinniartariaqarput.

- Sulisut ajornartorsiutaanerpaapput, pissutigalugu peqqissaanermi piginnaasarpassuaqarnissaq pisariaqarpoq, anersaartuutillu qaffasissumik ilinniarsimasunit isumagineqarnissaat pisariaqarput, nakorsaaneq, Henrik L. Hansen oqarpoq.

Nunatsinni peruluttut inaat maanna pisariaqartinneqanngillat. Tunillatsissimasut marluk nunatsinniittut peqqisseqqissimasut ataasinngornermi uppernarsarneqarpoq.