Inuit isumaannik misissuineq tikkuussinngilaq
Inuit isumaannik misissuineq malillugu IA nunatsinni partiit anginersariuarsinnarpaat. IA-p 2009-mi qinersisoqarmat taasinerit 44,2%-ii pissarsiarai, tamannalu attatiinnakannerpaa. Misissuinermi inernerusoq 43,4%-iuvoq ilaasortaatitanillu 14-inik pissarsissutaassalluni, partiip Inatsisartuni atorunnaaqqammersuni ilaasortaatitarisaata amerlaqatai.
Naalakkersuisooqatigiinni partii alla, Demokraatit, qinersinermi kinguariartussatut isikkoqarpoq, tamannalu ilaasortaatitamik ataatsimik annaasaqarneranik kinguneqarsinnaavoq, Demokraatillu maanna sisamanik ilaasortaatitaqartut qinersinerup kingorna pingasuinnarnik ilaasortaatitaqalertussatut isikkoqarput. Kinguariarneq procentinngorlugu 12,8%-init 9,9 %-iuvoq.
Naalakkersuisooqatigiinni partiit pingajuat, Kattusseqatigiit Partiiat, nungutaangajavissortussaarpasippoq. Anthon Frederiksen piffissami sivisoorsuarmi Ilulissani borgmesteriusimanini qinersinermi kingullermi iluaqutigilluarpaa, taamatullu sunniuteqarnera nungussimarpasippoq, partiilu taasinerit 1,2%-iinik pissarsisussatut isikkoqarpoq, qinersinermi kingullermi taasinerit 3,8 %-ii pissarsiarisimallugit. Inatsisartunngortussat Kattusseqatigiit Partiiannit ilaasortaatitaqarfiunnginnissaannik tamanna kinguneqassaaq.
Nunatsinni partiit anginersaata tullia suli Siumuuvoq, qinersineq kingulleq sioqqullugu Naalakkersuisunut siulittaasuuffimmik ingerlatsiuartuusimasoq. Nunarpulli siullerpaamik arnamik naalakkersuisunut siulittaasoqalernissaa ilimanarpallaanngilaq. Aleqa Hammond parteeqataalu taasinerit 36,0%-iinik pissarsisussatut isikkoqarput, 2009-mili qinersinermut ajutoorfigisaannut naleqqiullugu siuariarput. Partii taamani taasinerit 26,8 %-ii pissarsiarivaat. Ilaasortaatitassanngortikkaanni, qinersinermi kingullermi qulingiluaasinnarlutik aqqaneq marlunngortussatut isikkoqarput.
Atassut 1979-imi namminersornerulernermi qinersinermi nunatsinni partiit annersarisimasaat, nunatsinni tapersersorneqarpallaarunnaarsimalluni kingumut takoqqissimaarpasippaa. Qinersinermi kingullermi partii pingasunik ilaasortaatitaqalerpoq taasinerillu 11,0%-ii pissarsiaralugit. Maanna marlunnik ilaasortaatitaqalertussatut taasinerillu 6,6%-iinik pissarsisussatut isikkoqarpoq. Partii Inatsisartuni piffissami sivisuumi marluinnarnik ilaasortaatitaqarpoq, qinersinermi kingullermi taaguunneqarluartoq Finn Karlsen qinersinerup kingorna Siumumut nuussimammat.
Nunatsinni partiit nutaajunerpaartaat, Partii Inuit, taasinerit 3,2 %-iinik pissarsisussatut isikkoqarpoq, Inatsisartunilu ataatsimik ilaasortaatitaqalertussatut isikkoqarluni.
