Inuit Ataqatigiit: Amerikamiut kisimik millioninik isumaqatigiissuteqarnermit iluaqutissarsissapput
USA-mit nunatsinnut 83 millionit koruuninik aningaasaliisoqalerpoq. Aningaasat aatsitassarsiornermut, takornariaqarnermut ilinniartitaanermullu atorneqassapput.
Isumaqatigiissut Naalakkersuisunit ”ajunngitsuunerarlugu” ersaattaatigineqarpoq.
Illuatungiliuttulli annerpaartaasa, Inuit Ataqatigiit ersaattaatinngillat. Millionilikkaammi USA-mut annermik iluaqutissartaqassasut, Inuit Ataqatigiinnit, Mimi Karlsen Sofia Geislerilu isumaqarput.
AAMMA ATUARUK Nunarput USA-lu koruuninik millionilikkaanik nalilinnut suleqatigiissasut
Mimi Karlsen Nunanut allanut tunngasunut sillimaniarnermullu politikki pillugu ataatsimiititaliami siulittaasup tullersortaavoq, Sofia Geislerilu ilaasortaalluni.
- Suliniutit suulluunniit inuussutissarsiutinik nutaanik pilersitsinissamik, ilinniakkanik nutaanik periarfissiuussinissamut inuiaqatigiinnilu piginnaasat annertusarnissaannik siunertaqartut Inuit Ataqatigiinniit tapersersorpagut.
Kisianni:
- Nunatta USA-llu akornanni suleqatigiinnertut annertuumik saqqummersikkusunneqartukkut takujuminaappoq Nunatsinnut iluaqutissartaa qanoq annertutiginersoq, takujuminarnerullunili USA-mut qanoq iluaqutaatigiumaarnissaa. Nikingasoqarpoq, kialluunniit takusinnaasaanik, Mimi Karlsen Sofia Geislerilu allapput.
Amerikamiut immikkut ilisimasaqartuinit siunnersorneqarneq
Aningaasat 83 millionit koruunit nunatsinnut toqqaannartumik nassiunneqarnavianngillat – aningaasat amerikamiut immikkut ilisimasaqartuinit siunnersuisoqarneratigut atorneqarnissaat naatsorsuutigineqarpoq.
- Inuit Ataqatigiinniit maluginiarparput suliniutinut assigiinngitsunut amerikarmiut tapiiniarneranni annerpaamik pineqarmat amerikarmiut ilisimasalittaannik suliarineqartussanik ilisimasanik katersuinissamut aningaasaliissuteqarniarneq. Tassami aningaasaliiniarnermi iluaqutissarsisussaq annerpaaq tassaavoq USA-mi qitiusumik naalakkersuinermik aqutsisut, tassami ilisimasat Nunatsinni pingaarutilimmik ingerlatsinermut tunngassuteqartut katersorneqartut USA-mi immini katersugaataalerlutik pigineqalertussaammata, Inuit Ataqatigiit allapput.
Rusland aamma Kina
Amerikamiut Danmarkimi aallartitaata, Carla Sandsip millionit pillugit isumaqatigiissut danskit naalakkersuisuinit ’tamakkiisumik isumaqataaffigineqarnerarpaa’.
Taassuma oqarnera naapertorlugu aningaasat millionikkaat nunatsinni ineriartortitsinermut iluaqutaanissaat neriuutigineqarpoq.
AAMMA ATUARUK Ilisimasallit: USA nunatta ikinngutinnaavini tulliujumalluni akiliisoq
- USA saniliisa siuariartornerisa isumannaatsumillu misiginerisa qulakkeernerat uatsinnut aamma iluaqutaassaaq. Taamaalillutik aamma uagut malittarisassatta assiginngisaannik ingerlariaaseqartunit pissaaneqartunit sunniiffigineqarnissamut suleqatigisaqalernissamullu aarlerinartorsiunnginnerussapput, Carla Sands oqarpoq.
Kinap Ruslandillu Issittumi iliuuseqarnissaat amerikamiut nunanut allanut tunngasunut ministeriata, Mike Pompeop aamma Carla Sandsip qasseeriarlutik mianersoqqussutiginikuuaat.
