Inuit Ataqatigiinneersoq: Kim Kielsenip Randi Vestergaard Evaldsen salliutippaa

Aviisi Sermitsiaq ullumi saqqummersoq taama allaaserisaqarpoq.

Demokraatit aqagu arfininngornermi immikkut ittumik nuna tamakkerlugu ataatsimeersuassapput, partiillu siulittaasuata Anda Uldumip januaarip qaammataani tunuarnera pissutigalugu siulittaasumik nutaamik qinersisoqassaaq.

Randi Vestergaard Evaldsenip februaarip aappaani - Demokraatini siulittaasussarsiorneq suli ingerlasoq - aningaasaqarnermut aatsitassanullu naalakkersuisunngortinneqarnera, Demokraatit iluminni siulittaasussarsiorneranni taassuminnga salliutitsiniarnertut Aqqaluaq B. Egedep nalilerpaa.

- Tamanna anguniagaqarluni iliuuseqarneruvoq, Aqqaluaq B. Egede naliliivoq. Taanna isumaqarpoq Naalakkersuisuni nikititerisoqannginnerani Demokraatit siulittaasumik nutaamik qinersinissaat Kim Kielsenip utaqqeqqaartariaqaraluaraa.

Aamma atuaruk Naalakkersuisut nikinnerat illuatungiliuttuninngaanniit apeqquserneqarpoq

Evaldsen Demokraatini siulittaasussatut qinerneqassanngippat naalakkersuisuni nikititereqqittoqarnissaa Aqqaluaq B. Egedep aarleqqutigaa, tamanna suliassaqarfinni angisuuni marlunni, tassalu aningaasaqarnermut aatsitassanullu suliassaqarfinni, suliatigut kinguaattooruteqarnissaa ernumassutigigamiuk, aammattaaq naalakkersuisoqarfiit taakku angisuut naalakkersuisumit ataasiinnarmit akisussaaffigineqarunnaarsillugit avinneqartariaqarsorai.

Demokraatini siulittaasussatut sassartut ilaata, Justus Hansenip, aamma taama isumaqarluni nalunaarutigisimavaa.

- Suliassaqarfiit taakku marlunnut avinneqartariaqartut aamma uanga isumaqarpunga, tamannali isumaqatigiinniutigineqartariaqassaaq, Justus Hansen Sermitsiamut taama oqarpoq.

Aamma atuaruk Aningaasaqarnermut naalakkersuisoqarfik Randip akisussaaffigilissavaa