Assi: KNR

NIKITITERINEQ Aningaasaqarnermut naalakkersuisoqarfik Randip akisussaaffigilissavaa

Anda Uldumip naalakkersuinermik suliaqarnerminit tunuarnerata kingunerisaanik Demokraatineersoq Randi Vestergaard Evaldsen aningaasaqarnermut aatsitassanullu naalakkersuisunngussaaq.

Aningaasaqarnermut aatsitassanullu naalakkersuisup Anda Uldumip siorna novembarip qaammataani napparsimalluni sulinngiffeqalernerata kingorna naalakkersuinermik sulialik 31-nik ukioqartoq naalakkersuisunngortinneqarpoq.

Inatsisartuni ilaasortaanerminit sulinngiffeqarluni inuussutissarsiornermut naalakkersuisunngorpoq, Vittus Qujaukitsoq (S) nunanut allanut tunngasunut naalakkersuisuunermi saniatigut aningaaasaqarnermut aatsitassanullu naalakkersuisunngorluni.

Naalakkersuisut akisussaaffiinik taamani allanngortitsineq utaqqiisaasuuvoq, Anda Uldumip napparsimalluni sungiffeqarnermi kingorna sulileqqinnissaa naatsorsuutigineqarmat, taannali naalakkersuinermik suliaqarnerminit kingorna tunuarpoq.

Naalakkersuisut siulittaasuata Kim Kielsenip tamanna tunngavigalugu Demokraatit aningaasaqarnermut aatsitassanullu naalakkersuisuuffik akisussaaffigileqqissagaat aalajangerpoq, soorlu tamanna naalakkersuisooqatigiinnissamik isumaqatigiissummi tamanna allassimasoq.

Aamma atuaruk Vittup uppernarsarpaa: Aningaasaqarnermut naalakkersuisunngorpoq

Aamma atuaruk Uldumip napparsimalersimanera Kielsenip uppernarsarpaa

Suliassaqarfinnik tunniussineq Aningaasaqarnermut naalakkersuisoqarfimmi ullaaq manna nalunaaqutaq qulinut pissasoq, Naalakkersuisut tusagassiorfinnut nalunaaruteqarlutik ilisimatitsissutigaat.

Vittus Qujaukitsup (S) taamalilluni inuussutissarsiornermut, suliffeqarnermut, niuernermut nunanullu allanut tunngasunut naalakkersuisutut akisussaaffigisani uterfigeqqissavai.

Randi Vestergaard Evaldsen Sisimiormiuuvoq apriilimilu 32-liissalluni. Takornariartitsinermik sammisaqarluni serviceøkonomitut ilinniagaqarpoq nunanilu tamalaani niuernermik nittarsaassinermillu ilinniagaqarnini siorna aamma naammassillugu.

Demokraatineersoq Inatsisartunut 2014-imi qinigassanngorteqqaarpoq 108-nillu qinerneqarluni qinigaalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat